“O‘zbekistonda diniy erkinlik bo‘yicha haligacha hal etilmagan yoki yetarlicha e’tibor qaratilmayotgan masalalar ko‘p” — Akmal Saidov

O‘zbekistonda diniy erkinlik bo‘ycha haligacha hal etilmagan yoki yetarlicha e’tibor qaratilmayotgan masalalar ko‘p. Bu haqda Oliy Majlisi Qonunchilik palatasi spikeri birinchi o‘rinbosari, Inson huquqlari bo‘yicha O‘zbekiston Milliy markazi direktori Akmal Saidov 19-may kuni Buxoro shahrida “Deklaratsiyalar muloqoti” mavzusidagi xalqaro forumda aytib o‘tdi.

Uning ta’kidlashicha, O‘zbekistonda diniy erkinlikni ta’minlash masalalariga alohida e’tibor qaratilmoqda. Bugungi kunda diniy erkinlik sohasidagi islohotlar O‘zbekistonda amalga oshirilayotgan siyosiy-huquqiy islohotlarning asosiy qismidir.

Millatlararo totuvlik va diniy bag‘rikenglikni ta’minlash  Yangi O‘zbekistonning inson huquqlari sohasidagi asosiy ustuvor yo‘nalishlarini biri sifatida belgilangan. Inson va fuqaroning huquqlari, erkinliklari va qonuniy manfaatlarini ta’minlashga, O‘zbekistonning birligi va yaxlitligini mustahkamlashga qaratilgan O‘zbekistonning millatlararo munosabatlar sohasidagi davlat siyosati konsepsiyasi hayotga tatbiq etilmoqda.

Diniy e’tiqod erkinligini mustahkamlash sohasidagi xalqaro norma va talablarni milliy qonunchilikka tatbiq etish maqsadida xalqaro tashkilotlar bilan yaqin hamkorlik yo‘lga qo‘yilgan.

“Vijdon erkinligini ta’minlash sohasidagi hamkorlik nafaqat xalqaro tashkilotlar, balki mamlakat miqyosida, jumladan, xorijiy davlat institutlari va fuqarolik jamiyati orqali ham amalga oshiriladi. Mamlakatimizda amalga oshirilayotgan salmoqli ishlarga qaramay, haligacha hal etilmagan yoki yetarlicha e’tibor qaratilmayotgan masalalar ko‘p”, — degan Inson huquqlari bo‘yicha O‘zbekiston Milliy markazi direktori.

Shuningdek, ko‘p millatlilik sharoitida ma’naviy-diniy tiklanish sohasidagi eng muhim muammolardan birini keltirib o‘tgan.

“Jamiyatni ma’naviy-axloqiy yangilashning muhim omili diniy ta’lim va ma’rifatdir. Shu bilan birga, ko‘p millatlilik sharoitida ma’naviy-diniy tiklanish sohasidagi eng muhim muammolardan biri diniy ta’lim jarayonini yo‘lga qo‘yish, imom-xatiblar va ruhoniylar malakasini oshirishdir”, — degan Akmal Saidov.

Tadbirda forumda taniqli dinshunos olimlar va ilohiyotshunoslar — Butunjahon musulmonlar ligasi (KSA) bosh kotibining maxsus elchisi Abdul Aziz Sarxon, AQSH Xalqaro e’tiqod erkinligi bo‘yicha komissiyasi raisi Nadin Mayenza, Argungau (Nigeriya) amirligi amiri al-Hoji Samoil Muhammad Mer, Indoneziya Fanlar akademiyasi Madaniyat ishlari bo‘yicha komissiyasi raisi Amin Abdulloh kabi nufuzli mehmonlar ishtirok etgan.