“O‘zsuvta’minot” Xorazm viloyatida ichimlik suvi va oqova xizmatlar bo‘yicha 2024-yil 16-iyundan amalda qo‘llaniladigan yangi tariflar tasdiqlanganini e’lon qildi.
Unga ko‘ra, ushbu sanadan narxlar quyidagicha o‘zgaradi (narxlar QQSsiz):
Ichimlik suvi:
- aholi uchun 1 metr kub — 3 500 so‘m;
- byudjet tashkilotlari uchun 1 metr kub — 8 000 so‘m;
- ulgurji iste’molchilar uchun 1 metr kub — 8 000 so‘m;
Oqova suv xizmati:
- aholi uchun 1 metr kub — 1 700 so‘m;
- byudjet tashkilotlari uchun 1 metr kub — 2 800 so‘m;
- ulgurji iste’molchilar uchun 1 metr kub — 2 800 so‘m.
Qayd etilishicha, o‘tgan besh yilda Xorazm viloyatida markazlashgan ichimlik suvi bilan ta’minlanish darajasi 52,1 foizdan 90,4 foizga yetkazildi. 2024-yil yakuni bilan bu ko‘rsatkich 91,2 foizga yetkazilishi kutilmoqda.
Yevropa tiklanish va taraqqiyot bankining 150 mln dollar qiymatida imtiyozli kredit mablag‘larini jalb qilish evaziga viloyat aholisini ichimlik suvi bilan taʼminlovchi quvvati 200 ming metr kubli asosiy Pitnak ichimlik suvi tozalash inshootini rekonstruksiya qilish va quvvatini 400 ming metr kubga yetkazish (30 million dollar) ko‘zda tutilgan.
Shuningdek, ichimlik suvi manbasidan uzoq masofada bo‘lgan Gurlan, Yangibozor, Shovot tumanlarini uzluksiz ichimlik suvi bilan taʼminlash maqsadida Gurlan tumanida yangi ichimlik suvi tozalash inshootini qurish, Urganch, Xiva, Pitnak kanalizatsiya tizimlarini rekonstruksiya qilish va yangidan qurish, Gurlan tumanida kanalizatsiya tizimlarini barpo qilish rejalashtirilgan.
Bundan tashqari, ish haqi, elektr-energiya, soliq to‘lovlari, xorijiy kreditlar to‘lovi amalga oshirilgan bo‘lib, joriy va kapital ta’mirlash, tizimni modernizatsiya qilish ishlarida ham sarf-xarajatlar talab etiladi.
Shulardan kelib chiqib ichimlik suvi va oqova xizmatlar bo‘yicha yangi tariflar tasdiqlandi.
Izoh (0)