O‘zbekistonda so‘nggi 7 yilda aholining ichimlik suvi ta’minotini yaxshilashga 20 trillion so‘mga yaqin mablag‘ yo‘naltirildi. Bu haqda “O‘zsuvta’minot” axborot xizmati rahbari Akmal Murodov ma’lum qildi.
Uning qayd etilishicha, bu so‘nggi 25 yilga nisbatan 8 baravar ko‘pdir.
Bu mablag‘lar hisobidan 2 916 ta suv inshooti va 43 ming kilometrga yaqin ichimlik suvi tarmoqlari tortildi. Natijada aholining markazlashgan ichimlik suvi bilan ta’minlanganlik darajasi 2017-yilda 63 foizni tashkil etgan bo‘lsa, bugunga kelib ushbu ko‘rsatkich 77 foizga yetkazildi.
Ushbu davr mobaynida 8 millionga yaqin aholi ilk bor markazlashgan ichimlik suvi bilan ta’minlanib, 14,5 million nafar aholining ichimlik suvi ta’minoti yaxshilandi.
Bundan tashqari, iste’molchilar uchun takomillashtirilgan shaxsiy kabinet joriy etilib, u orqali iste’molchilar to‘lovlar hisobotini oylar, yillar kesimida ko‘rib borishi, shu yerning o‘zida to‘lovni amalga oshirishi va hisoblagichlar ma’lumotlarini kiritishi imkoni yaratildi.
“O‘zsuvta’minot” axborot xizmati rahbarining ta’kidlashicha, suv suvtekin bo‘lishi kerak emas.
“Ichimlik suvi tariflari arzonligi undan xo‘jasizlarcha foydalanish, ichimlik suviga bepisandlik bilan munosabatda bo‘lish omillaridan biri hisoblanadi”, — deydi Akmal Murodov.
2024-yil yanvar holatiga ko‘ra, aholining markazlashgan ichimlik suvi bilan ta’minlangganlik darajasi 77,2 foizni tashkil etadi.
- Andijon — 90,0 foiz;
- Buxoro — 73,2 foiz;
- Farg‘ona — 79,4 foiz;
- Jizzax — 70,4 foiz;
- Navoiy — 84,7 foiz;
- Namangan — 82,7 foiz;
- Qashqadaryo — 59,4 foiz;
- Samarqand — 75,4 foiz;
- Surxondaryo — 62,9 foiz;
- Sirdaryo — 86,9 foiz;
- Toshkent viloyati— 79,4 foiz;
- Xorazm — 90,4 foiz;
- Toshkent shahri — 97,7 foiz;
- Qoraqalpog‘iston Respublikasi — 72,4 foiz.
“O‘zsuvta’minot” ma’lumotidan ko‘rish mumkinki, aholisi ichimlik suvi bilan ta’minlanganlik darajasi eng past hudud Qashqadaryo viloyati bo‘lib turibdi. “O‘zsuvta’minot” boshqaruvi raisi o‘rinbosari hududda ichimlik suvi ta’minoti qamrovini kengaytirishga qaratilgan islohotlar bir daqiqaga ham to‘xtamaganini aytgandi.
Izoh (0)