Xitoy rahbari G‘azo bo‘yicha xalqaro konferensiya o‘tkazishga chaqirdi

Xitoy rahbari Si Szinpin Isroil va HAMAS harakati o‘rtasidagi urushni tugatish uchun keng ko‘lamli tinchlik konferensiyasi o‘tkazishga chaqirdi.

Xitoy rahbari 30-may kuni Pekinda arab davlatlari vakillari bilan uchrashuvda Yaqin Sharq rivojlanish uchun katta istiqbolga ega mamlakat ekani, biroq u yerda hamon urush davom etayotganini ta’kidlagan.

Urush cheksiz davom eta olmaydi, adolat abadiy yo‘qolmaydi va ikki davlat to‘g‘risidagi qarorni o‘zboshimchalik bilan buzib bo‘lmaydi, — dedi Si Szinpin.

Uning so‘zlariga ko‘ra, Xitoy 1967-yildagi chegaralar doirasida to‘liq suverenitetga ega bo‘lgan mustaqil Falastin davlatini, uning poytaxti Sharqiy Quddusni tashkil etishni qatʼiy qo‘llab-quvvatlaydi. Shuningdek, u Falastinning BMTga to‘laqonli aʼzo sifatida kirishiga rozilik bildirgan hamda kengroq, obro‘li va samaraliroq xalqaro tinchlik konferensiyasi tashkil etilishi tarafdori.

Si Szinpindan so‘ng so‘zlagan Misr prezidenti Abdulfattoh as-Sisi xalqaro hamjamiyatni Isroilning G‘azoda HAMASga qarshi urushini to‘xtatishga chaqirgan.

Xalqaro hamjamiyatni G‘azoga zudlik bilan uzoq muddatli gumanitar yordam ko‘rsatishga, Isroil qamalini va falastinliklarni o‘z yerlarini majburan tark etishga urinishlarni to‘xtatishga chaqiraman, — dedi as-Sisi.

Avvalroq Misr rahbari bilan muzokaralar chog‘ida Si Szinpin G‘azodagi “o‘ta og‘ir” vaziyatdan qattiq qayg‘uda ekanligini ta’kidlagan. Xitoy rahbari hozirgi kunda birinchi ustuvor vazifa mojaro tarqalishining oldini olish, mintaqaviy tinchlik hamda barqarorlikka taʼsir ko‘rsatish va yanada jiddiy gumanitar inqirozning oldini olish uchun zudlik bilan o‘t ochishni to‘xtatish zarurligini aytgan.