Хитой раҳбари Ғазо бўйича халқаро конференция ўтказишга чақирди

Хитой раҳбари Си Цзиньпин Исроил ва ҲАМАС ҳаракати ўртасидаги урушни тугатиш учун кенг кўламли тинчлик конференцияси ўтказишга чақирди.

Хитой раҳбари 30 май куни Пекинда араб давлатлари вакиллари билан учрашувда Яқин Шарқ ривожланиш учун катта истиқболга эга мамлакат экани, бироқ у ерда ҳамон уруш давом этаётганини таъкидлаган.

Уруш чексиз давом эта олмайди, адолат абадий йўқолмайди ва икки давлат тўғрисидаги қарорни ўзбошимчалик билан бузиб бўлмайди, — деди Си Цзиньпин.

Унинг сўзларига кўра, Хитой 1967 йилдаги чегаралар доирасида тўлиқ суверенитетга эга бўлган мустақил Фаластин давлатини, унинг пойтахти Шарқий Қуддусни ташкил этишни қатъий қўллаб-қувватлайди. Шунингдек, у Фаластиннинг БМТга тўлақонли аъзо сифатида киришига розилик билдирган ҳамда кенгроқ, обрўли ва самаралироқ халқаро тинчлик конференцияси ташкил этилиши тарафдори.

Си Цзиньпиндан сўнг сўзлаган Миср президенти Абдулфаттоҳ ас-Сиси халқаро ҳамжамиятни Исроилнинг Ғазода ҲАМАСга қарши урушини тўхтатишга чақирган.

Халқаро ҳамжамиятни Ғазога зудлик билан узоқ муддатли гуманитар ёрдам кўрсатишга, Исроил қамалини ва фаластинликларни ўз ерларини мажбуран тарк этишга уринишларни тўхтатишга чақираман, — деди ас-Сиси.

Аввалроқ Миср раҳбари билан музокаралар чоғида Си Цзиньпин Ғазодаги “ўта оғир” вазиятдан қаттиқ қайғуда эканлигини таъкидлаган. Хитой раҳбари ҳозирги кунда биринчи устувор вазифа можаро тарқалишининг олдини олиш, минтақавий тинчлик ҳамда барқарорликка таъсир кўрсатиш ва янада жиддий гуманитар инқирознинг олдини олиш учун зудлик билан ўт очишни тўхтатиш зарурлигини айтган.