Samarqand, Sirdaryo hamda Andijon viloyatlarida tabiiy gaz va elektr tarmoqlariga noqonuniy ulanish holatlari fosh etildi. Bu haqda Bosh prokuratura huzuridagi departament xabar berdi.
Qayd etilishicha, departamentning Past Darg‘om tuman bo‘limi tomonidan tergovga qadar tekshiruv o‘tkazilgan. Tekshiruv davomida tumandagi “U.” fermer xo‘jaligi masʼul shaxslari tijorat maqsadida chorvachilik uchun mo‘ljallangan binosida gaz hisoblagich uskunasidan tabiiy gaz tarmog‘iga yer ostidan polietilen shlang orqali yashirin ulanib, jami 181,3 million so‘mlik tabiiy gazdan noqonuniy foydalangani aniqlangan.
Shu kabi, Departamentning Oqoltin tuman bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda “F.H.” MCHJ masʼul shaxslari va boshqalar “Shodlik” QFY hududi joylashgan baliqchilik ko‘liga o‘rnatilgan suv nasosi va 11 dona ko‘cha chiroqlari ulangan transformatorning hisoblash qurilmasiga qasddan shikast yetkazishib, jami 113,3 million so‘mlik elektr energiyasidan noqonuniy foydalangani ma’lum bo‘lgan.
Departamentning Qo‘rg‘ontepa tuman bo‘limi tomonidan o‘tkazilgan tergovga qadar tekshiruvda esa “A.F.” fermer xo‘jaligi rahbari R.A. va boshqalar Jalaquduq tumani “Gulbahor” massivida joylashgan 7,8 gektar mevali bog‘ maydoniga o‘rnatilgan suv nasosini hech qanday hujjatsiz tijorat maqsadida umumiy foydalanishdagi elektr tarmog‘iga o‘g‘rilik yo‘li bilan ulab, jami 100 million so‘mlik elektr energiyasidan noqonuniy foydalangani aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Andijonda o‘zboshimchalik bilan tabiiy gazdan noqonuniy foydalangan novvoyxona aniqlangani, O‘zbekistonning to‘rt hududida “svet” va tabiiy gaz tarmoqlariga noqonuniy ulanish holatlari fosh etilgani to‘g‘risida xabar berilgandi.
Izoh (0)