Самарқанд, Сирдарё ҳамда Андижон вилоятларида табиий газ ва электр тармоқларига ноқонуний уланиш ҳолатлари фош этилди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Паст Дарғом туман бўлими томонидан терговга қадар текширув ўтказилган. Текширув давомида тумандаги “У.” фермер хўжалиги масъул шахслари тижорат мақсадида чорвачилик учун мўлжалланган биносида газ ҳисоблагич ускунасидан табиий газ тармоғига ер остидан полиэтилен шланг орқали яширин уланиб, жами 181,3 миллион сўмлик табиий газдан ноқонуний фойдалангани аниқланган.
Шу каби, Департаментнинг Оқолтин туман бўлими томонидан ЭТК ходимлари билан ҳамкорликда ўтказилган терговга қадар текширувда “Ф.Ҳ.” МЧЖ масъул шахслари ва бошқалар “Шодлик” ҚФЙ ҳудуди жойлашган балиқчилик кўлига ўрнатилган сув насоси ва 11 дона кўча чироқлари уланган трансформаторнинг ҳисоблаш қурилмасига қасддан шикаст етказишиб, жами 113,3 миллион сўмлик электр энергиясидан ноқонуний фойдалангани маълум бўлган.
Департаментнинг Қўрғонтепа туман бўлими томонидан ўтказилган терговга қадар текширувда эса “А.Ф.” фермер хўжалиги раҳбари Р.А. ва бошқалар Жалақудуқ тумани “Гулбаҳор” массивида жойлашган 7,8 гектар мевали боғ майдонига ўрнатилган сув насосини ҳеч қандай ҳужжатсиз тижорат мақсадида умумий фойдаланишдаги электр тармоғига ўғрилик йўли билан улаб, жами 100 миллион сўмлик электр энергиясидан ноқонуний фойдалангани аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Андижонда ўзбошимчалик билан табиий газдан ноқонуний фойдаланган новвойхона аниқлангани, Ўзбекистоннинг тўрт ҳудудида “свет” ва табиий газ тармоқларига ноқонуний уланиш ҳолатлари фош этилгани тўғрисида хабар берилганди.
Изоҳ (0)