Isroil kuchlari 30-may kuni G‘azo shimolidagi Beyt Xanun hududiga hujum qilishi oqibatida kamida 9 nafar falastinlik halok bo‘ldi. Bu haqda Al Jazeera nashri xabar berdi.
Manbada aytilishicha, Isroil G‘azo shimolida yangi havo va quruqlik hujumlarini tashkil etgan. Voqea haqida G‘azoda bo‘lib turgan Al Jazeera muxbirlari xabar bergan.
Askarlar Beyt Xanundagi turar-joy binolarini o‘qqa tutgan. Hozirga qadar 9 kishi vafot etgani aytilgan. Hodisa oqibatida jarohatlanganlar soni nomaʼlum.
Manbaga ko‘ra, Isroil G‘azo shahri g‘arbidagi Shati lagerida ham hujum sodir etgan. Ushbu hududda yashayotgan ko‘chirilgan falastinliklar lagerni favqulodda tez tark etgan. So‘nggi marta Shati lagerida 20 kun oldin harbiy harakatlar kuzatilgan edi.
Al Jazeera Tel-Aviv kuchlari G‘azo shimolidagi Jabaliyada ham hujum sodir etganini yozgan. So‘nggi 24 soatda Jabaliya tevaragida yuz bergan portlashlar oqibatida kamida 50 kishi halok bo‘lgani aytilgan. Biroq hozircha ushbu maʼlumot tasdiqlanmagan.
Izoh (0)