Buxoro va Toshkent viloyatlarida kuchli ta’sir qiluvchi dori vositalari muomalaga kiritilishining oldi olindi

Buxoro va Toshkent viloyatlarida kuchli ta’sir qiluvchi dori vositalari muomalaga kiritilishining oldi olindi. Bu haqda Prokuratura departamenti xabar bermoqda. 

Ma’lum qilinishicha, holatlardan biri Bosh prokuratura huzuridagi departamentning Buxoro shahar bo‘limi tomonidan IIB xodimlari bilan hamkorlikda o‘tkazilgan tezkor tadbirda aniqlangan. Fuqarolar I.Y. va U.Q. noqonuniy daromad orttirish maqsadida fuqaro D.M.ga internet ijtimoiy tarmog‘i orqali jami 216 dona kuchli ta’sir qiluvchi dori vositalarini sotgani aniqlanib, I.Y.ga tegishli omborxonadan yana 1 740 dona kuchli ta’sir qiluvchi dori vositalari ashyoviy dalil sifatida olingan.

Xuddi shunday, departamentning Oqqo‘rg‘on tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda fuqarolar S.T. va J.N. oldindan o‘zaro til biriktirib, “Birlik” MFY hududida 2 nafar fuqaroga jami 172 dona  “Zardeks” nomli hamda yashil rangli kuchli ta’sir qiluvchi dori vositalarini 6,4 mln so‘mga sotgan vaqtida ushlanib, S.T.ning yonidan yana 64 dona “Zardeks” va “Gabapentin” nomli kuchli ta’sir qiluvchi dori vositalari ashyoviy dalil sifatida olingan.

Mazkur holatlar yuzasidan Jinoyat kodeksining 251-1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.