Бухоро ва Тошкент вилоятларида кучли таъсир қилувчи дори воситалари муомалага киритилишининг олди олинди. Бу ҳақда Прокуратура департаменти хабар бермоқда.
Маълум қилинишича, ҳолатлардан бири Бош прокуратура ҳузуридаги департаментнинг Бухоро шаҳар бўлими томонидан ИИБ ходимлари билан ҳамкорликда ўтказилган тезкор тадбирда аниқланган. Фуқаролар И.Ю. ва У.Қ. ноқонуний даромад орттириш мақсадида фуқаро Д.М.га интернет ижтимоий тармоғи орқали жами 216 дона кучли таъсир қилувчи дори воситаларини сотгани аниқланиб, И.Ю.га тегишли омборхонадан яна 1 740 дона кучли таъсир қилувчи дори воситалари ашёвий далил сифатида олинган.
Худди шундай, департаментнинг Оққўрғон туман бўлими томонидан ИИБ ходимлари билан ҳамкорликда ўтказилган тезкор тадбирда фуқаролар С.Т. ва Ж.Н. олдиндан ўзаро тил бириктириб, “Бирлик” МФЙ ҳудудида 2 нафар фуқарога жами 172 дона “Зардекс” номли ҳамда яшил рангли кучли таъсир қилувчи дори воситаларини 6,4 млн сўмга сотган вақтида ушланиб, С.Т.нинг ёнидан яна 64 дона “Зардекс” ва “Габапентин” номли кучли таъсир қилувчи дори воситалари ашёвий далил сифатида олинган.
Мазкур ҳолатлар юзасидан Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)