Chirchiqda 205 mln so‘mlik kuchli ta’sir qiluvchi dori vositalarini uyida saqlab kelayotgan ayol ushlandi

Toshkent viloyati Chirchiq shahrida 205 mln so‘mlik kuchli ta’sir qiluvchi dorilarni saqlayotgan ayol ushlandi. Bu haqda viloyat IIBB xabar berdi. 

Qayd etilishicha, 1-maydan 30-mayga qadar Toshkent viloyati hududida tarkibida giyohvandlik, psixotrop va kuchli ta’sir qiluvchi moddalar bo‘lgan dori vositalari bilan bog‘liq har qanday holatni aniqlab fosh etishga qaratilgan “Qora dori—2024” tezkor-profilaktik oyligi o‘tkazilmoqda.

Mazkur oylik doirasida viloyat IIBB va Chirchiq shahar IIB tezkor qidiruv xizmati xodimlari tomonidan o‘tkazilgan tadbirda, Chirchiq shahrida yashovchi 1981-yilda tug‘ilgan ayol (B.N.) shubhali harakatlari uchun yashash hududida to‘xtatilib tekshirilgan. Uning qo‘lida bo‘lgan ayollar sumkasida 498 dona “Zardeks” va 16 dona “Tropikamid” kuchli ta’sir qiluvchi dori vositasi borligi aniqlanib, ushlangan.

Surishtiruvlar davomida ushbu ayol yashash xonadonida keyinchalik sotish maqsadida 1 605 dona turli ko‘rinishdagi kuchli ta’sir qiluvchi dori vositalarini saqlab kelganligi aniqlangan.

O‘tkazilgan tezkor tadbir natijasida “qora bozor”dagi narxi 205 million so‘mga teng bo‘lgan 2 119 dona kuchli ta’sir qiluvchi dorilar daliliy ashyo sifatida hujjatlashtirilib, muomaladan olingan.

Hozirda holat yuzasidan tergovga qadar tekshiruv harakatlari olib borilmoqda.