Ukraina prezidenti Vladimir Zelenskiy Belgiya bosh vaziri Aleksandr De Kru bilan qo‘shma matbuot anjumanida mamlakatlarni 15—16-iyun kunlari Shveysariyaning Byurgenstok shahrida bo‘lib o‘tadigan “tinchlik sammiti”da ishtirok etish to‘g‘risida qaror qabul qilishga chaqirdi. U hali ham Braziliya, Xitoy va boshqa mamlakatlarning javobini kutayotganini aytdi.
“Hali ham javob bermagan rahbarlar bor... Agar liderlar jim turishsa, bundan yomoni yo‘q, menimcha. Chunki siz yo tinchlik tarafdorisiz, yo urush tarafdorisiz. Hech qaysi tarafni tanlamagandan ko‘ra, hech bo‘lmasa dushman tarafda ekanini bildirib qo‘ygan yaxshi. Bu shuni bildiradiki, agar siz jim turgan bo'lsangiz, demak siz hozir sodir bo'layotgan voqealarga rozisiz”, — dedi Vladimir Zelenskiy.
Zelenskiy taklifga hali javob bermagan bir qancha davlatlarni sanab o‘tdi. Ular orasida Kiyev “ijobiy signallar” olgan bir qancha Afrika davlatlari ham bor, deb taʼkidladi Ukraina prezidenti.
“Biz Xitoydan ham javob kutmoqdamiz. Men Braziliyadan javob eshitmoqchiman. Yana ko‘plab davlatlar bor, biz hamma uchun ochiqmiz”, — deya xulosa qildi Ukraina prezidenti.
Byurgenstokdagi Shveysariya konferensiyasiga 160 ta davlatdan delegatsiyalar taklif etilgan. 50 dan ortiq davlat sammitda ishtirok etishini tasdiqladi. Shveysariya Tashqi ishlar vazirligi Rossiya sammitda qatnashishini talab qildi, biroq Ukraina bunga qarshi chiqdi.
Rossiya prezidenti Vladimir Putin Ukrainaning “xohishlarini ifodalaydigan” takliflarni muhokama qilmoqchi emasligini ma’lum qildi.
Izoh (0)