Sudanning Shimoliy Darfur viloyatida 10-mayda boshlanib hozirga qadar davom etayotgan faol janglar oqibatida kamida 134 fuqaro halok bo‘lgan. Bu haqda “Chegara bilmas shifokorlar” tashkiloti hisobotiga asoslanib, CNN nashri xabar berdi.
Faol otishmalar asosan Shimoliy Darfur markazi Al-Fashir shahrida yuz bergan. Eng ko‘p qurbonlar ham shu shaharda kuzatilgani xabar qilingan.
Manbada aytilishicha, 10-may kuni Al-Fashir markazidagi bozor yaqinida qurolli guruhlar otishma boshlagan. Mahalliy aholi hududdan tezda evakuatsiya qilingan. Tinch aholiga ommaviy o‘q uzish holatlari kuzatilgan.
“Biz urishayotgan tomonlarni hayotdan ko‘z yumayotgan tinch aholi vakillarini himoya qilish uchun ko‘proq saʼy-harakat qilishga chaqiramiz”, — deyilgan “Chegara bilmas shifokorlar” tashkiloti hisobotida.
Janglar boshlangan ikki haftadan ko‘proq muddatda 979 kishi jarohatlanib, kasalxonalarga yotqizilgan. Rasmiylar Al-Fashirdagi tibbiyot muassasalari bemorlar bilan to‘la ekanini maʼlum qilgan.
Tezkor harakat kuchlari Al-Fashir shahrini qurshab olgani maʼlum qilingan. Ushbu guruh tomonidan egallangan to‘rt shtatdan qochgan aholi Shimoliy Darfur va uning markaziy qismlariga kelib joylashgan.
UNICEF maʼlumotlariga ko‘ra, hozirga qadar Shimoliy Darfur markazidan kamida 500 ming kishi ko‘chirib ketilgan. Oziq-ovqat, dori-darmon va boshqa mahsulotlar nihoyatda kam qolgan. Darfurda oziq-ovqat yordami yetkazib berish to‘xtab qolgan. Jahon oziq-ovqat dasturi mintaqada 1,7 million kishi favqulodda ochlik darajasini boshdan kechirayotganini maʼlum qilgan.
Maʼlumot o‘rnida, Sudanda mamlakat armiyasi va Tezkor harakat kuchlari qarama-qarshiligi 2023-yilning aprel oyida fuqarolar urushini keltirib chiqardi. BMTning Gumanitar masalalarni muvofiqlashtirish boshqarmasi maʼlumotlariga ko‘ra, urush boshlanganidan beri 8,8 milliondan ortiq sudanlik o‘z uyini tashlab ketgan. 25 millionga yaqin fuqaro yordamga muhtoj.
Izoh (0)