Украина президенти Владимир Зеленский Бельгия бош вазири Александр Де Кру билан қўшма матбуот анжуманида мамлакатларни 15—16 июнь кунлари Швейцариянинг Бюргенсток шаҳрида бўлиб ўтадиган “тинчлик саммити”да иштирок этиш тўғрисида қарор қабул қилишга чақирди. У ҳали ҳам Бразилия, Хитой ва бошқа мамлакатларнинг жавобини кутаётганини айтди.
“Ҳали ҳам жавоб бермаган раҳбарлар бор... Агар лидерлар жим туришса, бундан ёмони йўқ, менимча. Чунки сиз ё тинчлик тарафдорисиз, ё уруш тарафдорисиз. Ҳеч қайси тарафни танламагандан кўра, ҳеч бўлмаса душман тарафда эканини билдириб қўйган яхши. Бу шуни билдирадики, агар сиз жим турган бўлсангиз, демак сиз ҳозир содир бўлаётган воқеаларга розисиз”, — деди Владимир Зеленский.
Зеленский таклифга ҳали жавоб бермаган бир қанча давлатларни санаб ўтди. Улар орасида Киев “ижобий сигналлар” олган бир қанча Африка давлатлари ҳам бор, деб таъкидлади Украина президенти.
“Биз Хитойдан ҳам жавоб кутмоқдамиз. Мен Бразилиядан жавоб эшитмоқчиман. Яна кўплаб давлатлар бор, биз ҳамма учун очиқмиз”, — дея хулоса қилди Украина президенти.
Бюргенстокдаги Швейцария конференциясига 160 та давлатдан делегациялар таклиф этилган. 50 дан ортиқ давлат саммитда иштирок этишини тасдиқлади. Швейцария Ташқи ишлар вазирлиги Россия саммитда қатнашишини талаб қилди, бироқ Украина бунга қарши чиқди.
Россия президенти Владимир Путин Украинанинг “хоҳишларини ифодалайдиган” таклифларни муҳокама қилмоқчи эмаслигини маълум қилди.
Изоҳ (0)