Isroil kuchlari Rafahdagi qochqinlar yashaydigan Tal-as-Sulton lagerini bombardimon qildi, 40 ga yaqin odam halok bo‘ldi. Bu haqda Al Jazeera xabar berdi.
Ta’kidlanishicha, qurbonlarning aksariyati ayollar va bolalar bo‘lgan. Falastin Qizil yarim oy jamiyati chodirlardagi ko‘plab odamlar tiriklab yonib ketganini ta’kidlagan.
“Hududdagi shifoxonalar Isroil ishg‘olining G‘azo sektoridagi sog‘liqni saqlash tizimini ataylab yo‘q qilishi natijasida bunday ko‘p sonli jarohatlanganlari sig‘dira olmayapti”, — deyiladi bayonotda.
Mahalliy manbalar kamida sakkizta raketa BMTning falastinlik qochqinlarga yordam ko‘rsatuvchi agentligi (UNRWA) ombori yonida yaqinda o‘rnatilgan chodir lageriga urilganini aytdi.
“Garchi Isroil xavfsiz hudud deb belgilab, fuqarolarni u yerga ko‘chirishga majbur qilgan bo‘lsa ham, bizga favqulodda qo‘ng‘iroq keldi. Hududdagi yong‘inni o‘chirishga taxminan 45 daqiqa vaqt kerak bo‘ldi, bir qancha jasadlar va jarohatlanganlarni olib chiqdik. Jasadlarning aksariyati kuyib ketgan va yonib ketgan.
Potensial xalqaro miqyosda taqiqlangan qurollarni qo‘llash yirik yong‘in kelib chiqishiga sabab bo‘lgan, oqibatida jabrlanganlar oyoq-qo‘llarini yo‘qotgan va boshqa jarohatlar olgan. Biz 50 ga yaqin odamni va yaradorlarni hududdan olib chiqib, dala kasalxonalariga yetkazdik”, — deya ta’kidladi G‘azo fuqarolik mudofaasi guruhlarini boshqaradigan doktor Muhammad al-Mug‘ayyir
Isroil armiyasi o‘z bayonotida HAMAS lageriga havo hujumi uyushtirilganini da’vo qildi. Harbiylar tinch aholi jarohatlanganidan xabardor ekanini ma’lum qildi.
“Zarba xalqaro qonunlarga muvofiq, aniq o‘q-dorilardan foydalangan holda va HAMAS hududdan foydalanayotganini ko‘rsatuvchi aniq razvedka maʼlumotlariga asoslanib, qonuniy nishonlarga qarshi amalga oshirildi”, — deya qo‘shimcha qildi Isroil armiyasi.
Eslatib o‘tamiz, 26-may kuni HAMAS tinch aholi o‘ldirilishiga javoban yanvar oyidan buyon birinchi marta Isroilning markaziy rayonlariga raketalar uchirdi. Isroil armiyasi ularning aksariyati tutib olinganini ma’lum qildi.
Izoh (0)