Xalqaro jinoiy sud 24-may kuni Isroil hukumatiga Rafahda o‘tkazilayotgan harbiy operatsiyani zudlik bilan to‘xtatishni buyurdi. Bu haqda sud matbuot xizmati tarqatgan maʼlumotga asoslanib, CNN nashri xabar berdi.
Jinoiy sud prezidenti Navaf Salom buyruq chiqarilganini rasman maʼlum qilgan. Unda Isroil hukumatidan Rafahdagi har qanday xatti-harakatni to‘xtatish talab qilinadi.
“Isroil zudlik bilan Rafahdagi harbiy hujumini va G‘azodagi Falastin guruhini jismoniy yo‘q qilishga olib kelishi mumkin bo‘lgan hayotiy sharoitlarni keltirib chiqaradigan har qanday boshqa harakatlarini to‘xtatishi kerak”, — deyilgan Xalqaro jinoiy sud bayonotida.
Sud Rafahdagi gumanitar vaziyatni “halokatli” deb atagan. Agar Isroilning Rafahdagi operatsiyasi davom etsa, vaziyat yanada ham kuchayishiga olib kelishini bildirgan.
Isroil xalqaro hamjamiyat, jumladan AQSHning ogohlantirishiga qaramay, 7-may kuni Rafahga hujum boshlagan edi. Operatsiya davomida Rafahning Misr bilan chegara punkti egallab olingan. Shu voqeadan boshlab G‘azo janubiga gumanitar yordam kirishi to‘xtadi.
Bundan avval Xalqaro jinoiy sud Isroilga insonparvarlik yordami uchun Rafah o‘tkazish punktini ochishni buyurgan edi. Isroil bu talabni bajarmagan.
Xalqaro jinoiy sud qarorlari yakuniy va majburiydir. Ammo ushbu sud tizimida qarorlarni amalga oshirish mexanizmi yo‘q.
Avvalroq Xalqaro jinoiy sud prokurori HAMAS yetakchilari, shuningdek, Isroil bosh vaziri Binyamin Netanyaxu va mudofaa vaziri Yoav Gallantni urush jinoyatlari va insoniyatga qarshi jinoyatlarda ayblab hibsga olish uchun order berishni so‘ragani maʼlum qilingan edi.
Izoh (0)