Turkiyaning Mersin shahrida 26-may kuni avtobus ishtirokida sodir bo‘lgan yo‘l transport hodisasi oqibatida 11 kishi halok bo‘ldi, o‘nlab kishilar jarohatlandi. Bu haqda shahar gubernatori Ali Hamza Pehlivanga tayanib, Halk TV xabar berdi.
“Mersin gubernatori Pehlivan, birinchi maʼlumotlarga tayanib, trassada yuz bergan zanjirli avtohalokat natijasida 11 kishi halok bo‘lgani va 30 kishi jarohatlanganini maʼlum qildi”, — deyiladi bayonotda.
Adanadan kelayotgan avtobus yomg‘irli havoda sirpanib, qarama qarshi yo‘nalishga chiqib ketgan. Shundan keyin u ikkita yengil avtomobil va bitta yuk mashinasiga borib urilgan. Hodisa joyiga o‘t o‘chirish va tibbiyot xodimlari jalb qilingan. Hozirda jarohatlanganlar soni 38 tani tashkil etadi, ular orasida ahvoli og‘irlar ham bor.
Voqea sodir bo‘lganidan so‘ng Adliya vaziri Yilmaz Tunch quyidagicha bayonot bergan.
“Mersinning Tarsus okrugi Yenise tumanidagi TAG trassasida sodir bo‘lgan zanjirli yo‘l transport hodisasi barchamizni chuqur qayg‘uga soldi. Voqea yuzasidan Tarsus Bosh prokuraturasi tomonidan sud tergovi boshlanib, Tarsus Bosh prokurori rahbarligida 3 nafar prokuror tayinlandi. Yo‘l-transport hodisasida halok bo‘lgan fuqarolarimizga Allohdan rahmat, oila a’zolariga sabr-toqat, jarohatlangan fuqarolarimizga esa tezroq sog‘ayib ketishlarini tilayman”, — degan u.
Izoh (0)