Tvorog salomatlikni mustahkamlovchi, vazn va uyqusizlik bilan bog‘liq muammoni hal qilishga yordam beruvchi ajoyib mahsulotdir. Oqsil, vitamin va aminokislotalarga boy tvorogni bolalar va parhez tutuvchilar menyusiga kiritish muhim. Tvorogni to‘g‘ri tanlashda nimalarga e’tibor berish kerak? Yog‘li tvorog foydaliroqmi yoki yog‘sizmi? Ularning tarkibida qancha kalsiy mavjud? Quyida batafsil ko‘rib chiqamiz.
Tvorog tarkibi va foydali xususiyatlari
Sutda inson salomatligi uchun zarur ko‘plab foydali moddalar mavjud. Tvorog esa sutning sirka orqali konsentrlangan shaklidir. Shuning uchun unda foydali elementlar ko‘proq.
Tvorog tarkibi B2, B6, B12, D, E, P vitaminlari, foliy va askorbin kislotalari, retinol, fosfor kabi moddalardan iborat. Shuningdek, tvorog gemoglobin uchun ahamiyatli bo‘lgan temir moddasini o‘z ichiga oladi. 1 kg tvorog tayyorlash uchun 8-10 litr sut kerak bo‘lgani sababli ham ushbu mahsulotda temir miqdori sutdan ko‘proq bo‘ladi.
100 gramm tvorog tarkibidagi kalsiy miqdori 95−125 milligrammni tashkil qiladi. Kalsiy sochlar, tirnoqlar, tish va suyak to‘qimalarini tiklashga yordam beradi. Ushbu mahsulot bolalar, balog‘at yoshidagi o‘smirlar, homiladorlar hamda menopauza davrini boshidan o‘tkazayotganlar uchun zarur. Tvorog yosh bolalar va keksa odamlarning taomnomasida bo‘lishi shart bo‘lgan mahsulotdir.
Tvorog tarkibidagi miteonin aminokislotalari va vitaminlar jigar kasalliklari, aterosklerozning oldini oladi va asab tizimini mustahkamlashga yordam beradi.
Yog‘li va yog‘siz tvorogning farqi nimada?
Nutritsiologlar fikriga ko‘ra, yog‘sizlantirilgan tvorog tarkibida foydali elementlar kam bo‘ladi. Chunki unga sutli zardob qo‘shiladi va yuqori haroratda pishiriladi. Shu sababli yog‘siz tvorogda kalsiy miqdori kamroq bo‘ladi. Tvorogning yog‘li navlarini tayyorlashda esa ularga issiqlik bilan ishlov berilmaydi va mahsulot o‘zidagi barcha foydali moddalarni saqlab qoladi.
Ba’zi ishlab chiqaruvchilar yog‘siz tvorogga mazali ta’m berish uchun sintetik yog‘ qo‘shadi. Bunday tvorog kunlik kalsiy me’yorini qoplay olmaydi.
Shuningdek, yog‘li va yog‘siz tvorog orasidagi yana bir farq ularning kaloriyasidadir:
Yog‘ miqdori 18 foiz tvorog — 230 kkal;
Yog‘ miqdori 5−9 foiz tvorog — 160 kkal;
Yog‘ miqdori 2 foizdan oshmaydigan tvorog — 85 kkal.
Kalsiy organizmga yog‘siz to‘liq so‘rilmaydi. Har 10 mg kalsiy uchun 1 gramm yog‘ bo‘lishi kerak. Shuning sababli ozish uchun yog‘siz tvorog, umumiy salomatlikni qo‘llab-quvvatlash va turli kasalliklarda esa yog‘ miqdori yuqori bo‘lgan tvorogni iste’mol qilish tavsiya etiladi.
Izoh (0)