Творог саломатликни мустаҳкамловчи, вазн ва уйқусизлик билан боғлиқ муаммони ҳал қилишга ёрдам берувчи ажойиб маҳсулотдир. Оқсил, витамин ва аминокислоталарга бой творогни болалар ва парҳез тутувчилар менюсига киритиш муҳим. Творогни тўғри танлашда нималарга эътибор бериш керак? Ёғли творог фойдалироқми ёки ёғсизми? Уларнинг таркибида қанча калций мавжуд? Қуйида батафсил кўриб чиқамиз.
Творог таркиби ва фойдали хусусиятлари
Сутда инсон саломатлиги учун зарур кўплаб фойдали моддалар мавжуд. Творог эса сутнинг цирка орқали концентрланган шаклидир. Шунинг учун унда фойдали элементлар кўпроқ.
Творог таркиби B2, B6, B12, D, E, P витаминлари, фолий ва аскорбин кислоталари, ретинол, фосфор каби моддалардан иборат. Шунингдек, творог гемоглобин учун аҳамиятли бўлган темир моддасини ўз ичига олади. 1 кг творог тайёрлаш учун 8-10 литр сут керак бўлгани сабабли ҳам ушбу маҳсулотда темир миқдори сутдан кўпроқ бўлади.
100 грамм творог таркибидаги калций миқдори 95−125 миллиграммни ташкил қилади. Калций сочлар, тирноқлар, тиш ва суяк тўқималарини тиклашга ёрдам беради. Ушбу маҳсулот болалар, балоғат ёшидаги ўсмирлар, ҳомиладорлар ҳамда менопауза даврини бошидан ўтказаётганлар учун зарур. Творог ёш болалар ва кекса одамларнинг таомномасида бўлиши шарт бўлган маҳсулотдир.
Творог таркибидаги митеонин аминокислоталари ва витаминлар жигар касалликлари, атеросклерознинг олдини олади ва асаб тизимини мустаҳкамлашга ёрдам беради.
Ёғли ва ёғсиз творогнинг фарқи нимада?
Нутрициологлар фикрига кўра, ёғсизлантирилган творог таркибида фойдали элементлар кам бўлади. Чунки унга сутли зардоб қўшилади ва юқори ҳароратда пиширилади. Шу сабабли ёғсиз творогда калсий миқдори камроқ бўлади. Творогнинг ёғли навларини тайёрлашда эса уларга иссиқлик билан ишлов берилмайди ва маҳсулот ўзидаги барча фойдали моддаларни сақлаб қолади.
Баъзи ишлаб чиқарувчилар ёғсиз творогга мазали таъм бериш учун синтетик ёғ қўшади. Бундай творог кунлик калций меъёрини қоплай олмайди.
Шунингдек, ёғли ва ёғсиз творог орасидаги яна бир фарқ уларнинг калориясидадир:
Ёғ миқдори 18 фоиз творог — 230 ккал;
Ёғ миқдори 5−9 фоиз творог — 160 ккал;
Ёғ миқдори 2 фоиздан ошмайдиган творог — 85 ккал.
Калций организмга ёғсиз тўлиқ сўрилмайди. Ҳар 10 мг калций учун 1 грамм ёғ бўлиши керак. Шунинг сабабли озиш учун ёғсиз творог, умумий саломатликни қўллаб-қувватлаш ва турли касалликларда эса ёғ миқдори юқори бўлган творогни истеъмол қилиш тавсия этилади.
Изоҳ (0)