Samarqand viloyatining ikki tumanida kredit mablag‘larini o‘zlashtirish holatlari aniqlandi, deb xabar beradi Bosh prokuratura huzuridagi departament.
Qayd etilishicha, departamentning Bulung‘ur tuman bo‘limi tomonidan tergovga qadar tekshiruv o‘tkazilgan. Tekshiruvda “F.M.” xususiy korxonasi rahbari Z.A. va boshqalar tijorat banki filialidan un va qurilish mahsulotlari sotib olish uchun ajratilgan 1,5 milliard so‘m kredit mablag‘ini o‘zlashtirish yo‘li bilan talon-toroj qilgani aniqlangan.
Shu kabi, departamentning Payariq tuman bo‘limi tomonidan o‘tkazilgan tergovga qadar tekshiruvda “Ch.F.” MCHJ rahbari G‘.M. tijorat banki filialidan ajratilgan 1,1 milliard so‘m imtiyozli kredit mablag‘larini maqsadsiz ishlatib, o‘zlashtirish yo‘li bilan talon-toroj qilgani ma’lum bo‘lgan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq O‘zbekistonning qator hududlarida kredit pullarini o‘zlashtirganlar ushlangani, Qashqadaryoda kredit mablag‘larini o‘zlashtirgan bank boshqaruvchisi sobiq o‘rinbosari aniqlangani, Farg‘onada 19 nafar fuqaro nomiga avtokredit rasmiylashtirib, ajratilgan mablag‘ni o‘zlashtirgan shaxslar aniqlangani to‘g‘risida xabar berilgandi.
Izoh (0)