“Daryo” internet nashri tomonidan e’lon qilingan qisqa hikoyalar tanlovi davom etmoqda.
Obunachilarimiz mazkur tanlovda faol ishtirok etayotganini alohida ta’kidlash kerak. Mashhur jurnalistlardan tortib maktab o‘quvchilarigacha hikoya jo‘natmoqda.
Faqat bir muhim eslatma: tanlovga faqat o‘zingiz yozgan original hikoyalarni yuboring! Boshqalarning hikoyalaridan ko‘chirilgan yoki turli tillardan tarjima qilingan hikoyalar qabul qilinmaydi.
Quyida tahririyatimizga kelgan ba’zi hikoyalarni e’lon qilamiz.
Surat
Oilaviy fotoalbomdagi suratlarni birma-bir ko‘rib chiqayotgandim, taxminan 1 yoshlardagi bolaga ko‘zim tushdi. Bu bolakayning qayeridir menga, qayeridir ukalarimga o‘xshab ketardi. Aynan qaysi birimizning yoshligimiz ekanini oyimdan so‘rash niyatida ularga ushbu suratni ko‘rsatgandim, yig‘lab yubordilar. Albomda bolaning boshqa surati yo‘q edi.
Abduqahhorova Farangiz, Toshkent
Dam
Jamshid baqirib gapirar, piyola bilan boshimga solib yuboray derdi.
— Xudo bor, buni inkor qiladigan kim bo‘libsan?!
— Xo‘p. Unda nega namoz o‘qimaysan?
— Senga nima? Dahriysan-ku sen!
— Jannatga tushish uchun dahriy emaslikning o‘zi yetarlimi?
Osh ham zahar bo‘ldi.
Ikki kun o‘tgach ichkiliklar do‘koni yonida uchrashib qoldik. Aroqqa kirgan ekan. Meni ko‘rib, o‘zicha uyaldi.
— Dam olay degandim…
— Dindanmi?
Rahmatillo Turdaliyev, Namangan
Tasodif
— Menga hech kim bilan yurmagan, hayoli-iboli qiz kerak! — dedi yigit ammalariga. Qiz ham darrov topila qoldi. U ham birov bilan yurmagan mo‘mingina yigitni kutib yurgan ekan.
Ular uchrashuvga chiqishdi.
— Siz?! — dedi ikkisi ham baravar.
Nodira Ibrohimova
Ota
U uchinchi qizining ham kontraktga o‘qishga kirganini eshitdi va mehnatda qavargan qo‘llariga qaradi:
— O‘qitaman!!! — dedi o‘ziga o‘zi pichirlab...
Asenbaeva Dilafruz, Qoraqalpog‘iston Respublikasi
Muddat
— Men... Men shuni aytmoqchi edimki, men seni sevaman! Menga turmushga chiqasanmi..?
— ...
— Allo? Eshityapsanmi?
— Men o‘ylab ko‘rishim kerak...
— Mayli, bemalol, men go‘shakni qo‘ymay turaman...
Muhammadjon Yusupov
Umid
— Onajon, sochimni oldirsak, tez sog‘ayamanmi?
— ...Ha... bolam...
— Dadam kelgunlaricha o‘ssa bo‘ldi sochim. Bantik olib beraman degandilar...
Laziz Salimov, Navoiy viloyati
* * *
Tanlov 30-may sanasiga qadar davom etadi. O‘z hikoyalaringizni @daryo_hikoyalar_bot orqali jo‘nating.
Tanlov so‘nggida tahririyat tomonidan tanlab olingan hikoyalar ovozga qo‘yiladi va sayt obunachilari tomonidan eng ko‘p ovoz to‘plagan hikoya mualliflari g‘olib deb topiladi.
G‘oliblarga “Daryo” internet nashrining hamkori bo‘lgan Asaxiy internet do‘koni tomonidan taqdim qilingan sovg‘alar topshiriladi.
1-o‘ringa — 30 ta kitob
2-o‘ringa — 20 ta kitob
3-o‘ringa — 10 ta kitob
Asaxiy internet do‘konida sotuvda bo‘lgan kitoblar bilan quyidagi havola orqali tanishish mumkin.
Izoh (0)