Etiket qoidalariga ko‘ra, taomni o‘yin qilish mumkin emas, ammo AQSHda iste’mol qilish mumkin bo‘lgan odatiy predmetlar shaklidagi oziq-ovqatlar ishlab chiqarish ommalashgan.
Amerikaning muzlatilgan vaflilar ishlab chiqaruvchi brendi Eggo o‘zining yangi turdagi Eggo Fully Loaded Kicks nomli shirinligini taqdim etdi. Oyoq kiyim — krossovka shaklidagi vafli haqidagi xabarlar ijtimoiy tarmoqlarda keng muhokamaga sabab bo‘ldi.
Har bir shirinlik qo‘l mehnatida tayyorlanib, unga alohida dizayn qo‘llaniladi. Mazkur loyihaga “poyabzallar jarrohi” nomi bilan tanilgan Los-Anjeleslik dizayner Dominik Chambrone hamkorlik qildi. U Pizza Hut va Jack Daniel’s kabi mashhur brendlar uchun innovatsion dizaynlar ishlab chiqqan.
Eggo kompaniyasining iste’mol qilish mumkin bo‘lgan yangi poyabzali 3D printerda tayyorlanadi va asosi shirin vaflidan tashkil topgan. Kompaniyaning marketing bo‘yicha rahbari Kellanova mazkur g‘oyaga nima turtki bo‘lgani haqida so‘zlab berdi:
Zamonaviy ota-onalarning boshida ko‘plab yumushlar mavjud: XXI asr o‘smirlarining oshib borayotgan ishtahasidan tortib, modaga bo‘lgan ishtiyoqini qondirishgacha ular ko‘p qayg‘uradi. Nima iste’mol qilish va nima kiyish kerakligi haqidagi savollarga birgina mahsulot bilan javob berish uchun biz krossovka va vaflini sevuvchilarga birdek yoqadigan Eggo Fully Loaded Kicks’ni yaratdik.
Krossovkaning dizayni puxta ishlangan bo‘lib, uning yon tomonida sirop uchun yashirin cho‘ntaklari ham mavjud. Albatta, bunday mahsulotni ommaviy ishlab chiqarish yo‘lga qo‘yilmadi. Cheklangan kolleksiya 17-maydan boshlab sotuvga qo‘yildi va bir necha kun ichida barcha mahsulot sotildi. Har bir juft poyabzal 150 dollarga baholangan.
Izoh (0)