TikTok yulduzi, mahoratli oshpaz Robert Li yaqinda o‘z kanaliga video yuklashni boshladi va butun dunyoga mashhur bo‘ldi. U kundan kun ko‘payib borayotgan obunachilariga milliarderning shaxsiy oshpazi sifatida ish kuni qanday o‘tishini ko‘rsatib beradi. Robertning kanalida bir nechta video bor, biroq ko‘rishlar soni allaqachon 20 milliondan oshgan.
Oshpazning ta’kidlashicha, u pazandalik kurslarida tahsil olmagan va hatto restoranda ham ishlamagan. Obunachilardan biri uning qanday qilib bu ishga qabul qilinganligini so‘ragan. Rob esa ish beruvchisi bilan tasodifan uchrashib qolganini, unga omad kulib boqqanini aytgan. Biroq ko‘plab ijtimoiy tarmoq foydalanuvchilari yigitning sirli milliarderning oshpazi ekanligiga ishonadi. Rob esa bu haqda aniq ma’lumot bermagan.
Rob hech qachon oshpazlik kursida tahsil olmagan va restoranda ishlamagan
“Videolarim bunchalik ko‘p insonlarga manzur bo‘ladi, deb o‘ylamagandim”, — deydi yosh oshpaz.
Tomoshabinlarning uning ishlariga qiziqishi so‘nmasligi ajablanarli holat emas, chunki Rob har safar yangi taom tayyorlaydi.
Videolardagi ma’lumotlarga ko‘ra, Rob nonushta tayyorlash uchun erta tongda ishga keladi. Avval u bozordan kerakli mahsulotlarni sotib oladi, keyin bog‘dan ko‘katlarni yig‘adi va ovqat pishirishni boshlaydi. Rob izohlarda uy egasi barcha kerakli mahsulotlarni sotib olishi uchun unga kredit karta berishini aytgan. Yigitga taomlarni tanlashda to‘liq erkinlik beriladi.
Nonushta, tushlik va kechki taom oralig‘ida Robbining bo‘sh vaqti bo‘ladi, u bu vaqtini mashinasida sayr qilish yoki ochiq havoda hovlida dam olish, videolarni montaj qilish bilan o‘tkazadi. Uning dam olish kunlari bor, biroq, odatda, ish beruvchi uni qachon uyda bo‘lmasligi haqida ogohlantiradi va shunday holatda Robert ishga bormasligi mumkin bo‘ladi.
Ba’zi obunachilar uning oshpazlik iste’dodiga qoyil qolishidan tashqari, shaxsiy hayotiga ham qiziqish bildirmoqda. Rob izohlarda sevgan insoni yo‘qligini, uni topish niyatida ekanini aytgan.
Biroq yana bir tafsilot ijtimoiy tarmoq foydalanuvchilari nazaridan chetda qolmadi. Rob bunday mazali va murakkab taomlarni boy insonlar uchun pishiradi, o‘zi uchun esa makaronli yoki donli mahsulotlardan ovqat tayyorlaydi. Ko‘pchilik undan tayyorlagan taomlarini tatib ko‘rish masalasini so‘ragan, yigit esa agar xohlasa ovqatlarni yeb ko‘rishini aytgan.
Robning ma’lum qilishicha, videolarini uy egalari ham tomosha qiladi. Yosh oshpaz to‘xtab qolmaydi, u video suratga olishda va qalbining bir qismini obunachilar bilan baham ko‘rishda davom etmoqda.
Izoh (0)