Makkada umra safariga borgan o‘zbekistonlik erkakning buyumlari va tegishli hujjatlari bo‘lgan sumkalari o‘g‘irlab ketildi. Bu haqda “Dunyo” AA xabar berdi.
Bosh konsulxona maʼlumotiga ko‘ra, G.M. Saudiya Arabistoniga umra amallarni bajarish maqsadida borgan turmush o‘rtog‘i A.R. moddiy tomondan qiyin ahvolda qolgani sababli unga yordam ko‘rsatishni so‘rab murojaat qilgan.
Erkak Saudiya Arabistoniga umra amallarini bajarish maqsadida O‘zbekistondan 30-mart kuni velosipedda yo‘lga chiqqan. U O‘zbekistondan Rossiyaga, u yerdan Gruziyaga borgan. Gruziya chegarachilari tomonidan u kelgan joyiga, Rossiyaga qaytarib yuborilgan. Shundan so‘ng A.R. Vladikavkaz—Istanbul —Jidda yo‘nalishi bo‘yicha Saudiya Arabistoniga yetib kelgan.
Makkada bo‘lgan vaqtida uning buyumlari va tegishli hujjatlari solingan sumkalari o‘g‘irlab ketilgan.
Bosh konsulxona vakillari Makkadagi o‘zbekistonlik fuqarolar yordamida A.R.ni topishga erishdi va unga O‘zbekistonga qaytish uchun guvohnoma rasmiylashtirildi.
Faol vatandoshlar ko‘magida Madina—Toshkent yo‘nalishidagi aviaqatnovga chipta olib berildi va u 17-may kuni sog‘-salomat oilasi bag‘riga qaytdi.
Izoh (0)