Raqobatni rivojlantirish va iste’molchilar huquqlarini himoya qilish qo‘mitasi umra xizmatlari bo‘yicha noqonuniy reklamalar tarqatgan turoperatorlarga chora ko‘rilganini ma’lum qildi.
Ma’lum qilinishicha, bugungi kunda umra tadbirlarini litsenziyaga ega bo‘lmagan holda faoliyat yuritayotgan hamda litsenziyasi bor mahalliy turoperatorlar bilan hamkorlikda fuqarolarni ziyoratga yuborishga harakat qilayotgan vositachilar uchrab turadi. Ular o‘z nomlaridan noqonuniy reklamalar joylashtirib bormoqda.
Raqobatni rivojlantirish va iste’molchilar huquqlarini himoya qilish qo‘mitasiga Turizm qo‘mitasi tomonidan shunday turoperatorlarning reklamasi faoliyati yuzasidan murojaat kelib tushgan. Murojaat tegishliligi bo‘yicha Qoraqalpog‘iston Respublikasi raqobatni rivojlantirish va iste’molchilar huquqlarini himoya qilish qo‘mitasi tomonidan o‘rganib chiqildi.
O‘rganishlar davomida bugunga qadar mazkur hududda umra xizmatlarini ko‘rsatish bilan bog‘liq turistik faoliyatni amalga oshirish bo‘yicha litsenziyaga ega turoperatorlar mavjud emasligi, ular Toshkent shahri va viloyat turkompaniyalari bilan hamkorlikda ziyoratlarni tashkil etishda ishtirok etayotgani aniqlangan.
Shuningdek, murojaatda bildirilgan Iskander Tours va Oks Tours MСHJlar litsenziyasi yo‘qligiga qaramay, ijtimoiy tarmoqlarda umra xizmatlarini ko‘rsatishga qaratilgan noqonuniy reklamalar joylashtirib borayotgani aniqlangan.
Ushbu MCHJlarga nisbatan belgilangan tartibda ish qo‘zg‘atilib, tegishli tartibda javobgarlik belgilash yuzasidan qaror qabul qildi. Shuningdek, jamiyatlarga ushbu holatni bartaraf etib, kelgusida bunday holatga yo‘l qo‘ymaslik yuzasidan bajarilish lozim bo‘lgan ko‘rsatmalar berildi.
“Hurmatli fuqarolar! Umra ziyoratiga borishdan avval birinchi navbatda, xizmat ko‘rsatuvchi korxonaning litsenziyasi bilan tanishing, so‘ng reklamada berilgan ma’lumotlarga jiddiy e’tibor berib, ishonch hosil qiling. Noqonuniy reklamalarga duch kelib, bu borada huquqlaringiz buzilgan taqdirda Raqobat qo‘mitasining 1159 ishonch telefoniga murojaat qiling”, — deya qo‘mita fuqarolarni ogoh bo‘lishga chaqirdi.
Din ishlari bo‘yicha qo‘mita ham O‘zbekistonda umra ziyoratini reklama qilayotgan turfirmalar litsenziyasini surishtirishni tavsiya qilgandi.
Izoh (0)