O‘zbekistonda 68 nafar bolaning o‘limi va 16 nafar bolaning nogiron bo‘lib qolishiga sababchi bo‘lgan “Dok-1 Maks” siropi Gambiya davlatida ham 69 nafar bolaning o‘limiga olib kelgan. Shu bois Gambiya hukumati hindistonlik ishlab chiqaruvchilarni sudga bermoqda. Bu haqda “Dok-1 Maks” ishi bo‘yicha shikoyat arizani ko‘rib chiqayotgan apellyatsiya instansiyasi majlisida so‘z bordi.
Sudda Farmatsevtika tarmog‘ini rivojlantirish agentligining sobiq rahbari Sardor Kariyev manfaatini himoya qilayotgan advokat Ulug‘bek Latipov asosiy aybdorlardan biri, sirop ishlab chiqaruvchisi, hindistonlik tadbirkor Sachin Jayin jazodan qutulib qolayotganini aytdi.
2022-yilda Hindistonda ishlab chiqarilib, 1,3 million nafar aholisi bor Gambiya davlatiga import qilingan sirop tarkibida zararli moddalari bo‘lgani uchun Gambiyada ham 69 nafar (O‘zbekistonda 68 nafar bola) bola o‘limiga sababchi bo‘lgan. Gambiya davlati hukumati hozirda Hindistondagi ishlab chiqaruvchi korxonaga qarshi da’vo ishlari olib borish uchun AQSHdan xalqaro huquqshunoslarni yollagani aniqlandi, — deydi advokat.
Himoyachiga ko‘ra, bu jarayonda bolalar o‘limiga sababchi bo‘lgan dori vositalari namunalari JSST tizimidagi vakolatli laboratoriyalarda tekshiruvdan o‘tkazilib, natijalari hujjatlashtirib olingan.
Muhtaram raislik qiluvchi va sud hay’ati a’zolari! Hamma ich-ichidan asosiy aybdorni Hindistondan qidirish lozimligini tushunib turibdi. Mazkur iltimosnomamiz matnini shakllantirgan, shu ishda boshidan qatnashib kelgan rahmatli hamkasbim Farrux aka Xudoyberganovning quyidagi gaplarini keltirmoqchiman. “Agar ushbu voqelik bo‘yicha Hindistondagi asl aybdorlar javobgarlikka tortilmasdan qolib ketaversa, bu juda noxush pretsedent keltirib chiqarishi mumkin, ya’ni chet ellik dori ishlab chiqaruvchilar sifatsiz mahsulotlarini O‘zbekistonga olib kirilishi va odamlarimizning bu dorilardan zaharlanishlari davom etaveradi”. Qolaversa, tergov tili bilan aytganda: “tayyor veshdokni o‘zimiz yo‘q qilib, keyin asosiy jinoyatchilar Sachin Jayin va uning sheriklariga nimaga asoslanib ayb e’lon qilamiz?”. Shu sabab apellyatsiya sudidan bildirilgan barcha vajlarimizni inobatga olib, “Kuramaks medikal” MCHJ va bojxona omborlarida saqlanayotgan, undan tashqari, dorixonalardan yig‘ib olinib, “Dori-darmon” AK omborlarida saqlanayotgan “Dok-1 Maks” va “Ambronol” dori vositalarini ko‘zdan kechirib, mavjud har bir seriyadagi dorilardan 30 tadan kam bo‘lmagan miqdorda namunalarni ajratib olish kerak. Va ularni Jahon sog‘liqni saqlash tashkiloti tizimidagi yoki Sog‘liqni saqlash vazirligi tizimidagi laboratoriyalarda GJX uskunasida yangi tasdiqlangan Farmakopeya asosida tekshiruvdan o‘tkazish kerak. 30 tadan kam bo‘lmagan miqdordagi namunalarni ajratib olib, ularni nomuayyan muddatga maxsus omborxonada saqlab turish vazifasini Sog‘liqni saqlash vazirligi zimmasiga yuklash haqida ajrim chiqarishingizni iltimos qilaman, — dedi u.
Yana bir advokat Abror Nabiyev mazkur iltimosnomani qo‘llab-quvvatlar ekan, “Nahotki biz atigi 1,3 million nafar aholisi bo‘lgan Gambiya davlatichalik bo‘lolmaymiz? Tergov organi o‘z oldiga qo‘ygan maqsadga erishdik, deb o‘ylayapti. Vohalanki, aybi yo‘q odamlarni ham mana bu yerga qamab, jabrlanuvchilar ko‘z o‘ngida kimnidir jazolagandek ko‘rinishga urinmoqda. Biroq bu ishdagi eng asosiy aybdorlar masalasi ochiq qolmoqda, dedi.
Izoh (0)