Samarqandda ijaraga berilgan yerni sotmoqchi bo‘lgan shaxs qo‘lga tushdi. Bu haqda viloyat IIB matbuot xizmati xabar berdi.
13-may kuni Samarqand viloyati IIB tezkor qidiruv xizmati Korrupsiya va iqtisodiy jinoyatlarga qarshi kurashish bo‘limi tomonidan boshqa huquqni muhofaza qiluvchi organlar bilan hamkorlikda Samarqand shahrida tezkor tadbir o‘tkazilgan.
1993-yilda tug‘ilgan, Payariq tumanidagi mahallalardan birida yoshlar yetakchisi lavozimida ishlagan E.SH. ariza muallifiga Payariq tumani “Al-Buxoriy” mahallasi hududida joylashgan to‘rt nafar qarindoshiga dehqon xo‘jaligi yuritish uchun 30 yilga ijaraga berilgan jami 2,10 gektar sug‘oriladigan yer maydonini 36 ming dollarga sotishini va hujjatlarni uning nomiga rasmiylashtirib berishini aytib, oldindan 20 ming dollar olgan vaqtda ashyoviy dalillar bilan ushlangan.
Holat yuzasidan Jinoyat kodeksining 168-moddasi (firibgarlik) 4-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Izoh (0)