Andijon va Samarqand viloyatlarida yer maydonlarini sotish bilan bog‘liq firibgarlik holatlari fosh etildi.
Bosh prokuratura huzuridagi Departament hamda DXXning Oltinko‘l tumani bo‘limlari tomonidan o‘tkazilgan tezkor tadbirda fuqaro O.Sh. “Ittifoq” MFY hududidagi 80 sotix noturar yer maydonini fuqaro A.B.ga firibgarlik yo‘li bilan 160 ming dollarga sotishga kelishib, go‘yoki kadastr bo‘limida ishlovchi tanishlari yordamida ushbu yer maydonidan turar joy sifatida foydalanishi uchun yana 10 ming dollar berishi kerakligini aytgan.
Kelishilgan puldan 50 ming dollarni olgan vaqtida ashyoviy dalillar bilan ushlangan.
Shu kabi, Departament, DXX va IIB Samarqand viloyati boshqarmalari hamkorligida o‘tkazilgan tezkor tadbirda fuqaro Sh.E. Payariq tumani “Maniobod” mahallasida joylashgan ijara huquqi asosida dehqon xo‘jaligini yuritishi uchun ajratilgan 2,1 gektar yer maydonini fuqaro A.A.ga 36 ming dollarga sotishga kelishgan.
Oldindan 20 ming dollarini firibgarlik yo‘li bilan olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)