Pentagon rahbari Ukrainaga barqaror harbiy yordam berishni va’da qildi

AQSH mudofaa vaziri Lloyd Ostinning aytishicha, Amerika qurollari Ukrainaga “barqaror ravish”da yetkazib beriladi. Uning ta’kidlashicha, Ukraina ittifoqchilarining harbiy yordamlari jangovar harakatlar jarayoniga ta’sir qiladi.

Bugun, 20-may kuni Ukrainaga qurol yetkazib berishni muvofiqlashtirish bo‘yicha aloqa guruhining virtual formatdagi yig‘ilishi bo‘lib o‘tdi. Unda Ostindan tashqari, Ukraina mudofaa vaziri Rustem Umerov va Ukraina Qurolli kuchlari Oliy Bosh Qo‘mondoni Aleksandr Sirskiy ishtirok etdi.

AQSH mudofaa vaziri o‘zining kirish so‘zida uchrashuv Rossiya qo‘shinlari Ukraina hududiga yangi hujum boshlagan paytda “juda og‘ir pallada” bo‘layotganini ta’kidladi.

“Ammo biz Ukrainaga kerakli yordamni berishda davom etamiz. Qo‘shma Shtatlar o‘z vazifasini bajarishga sodiq qoladi. Qo‘shimcha mablag‘lar o‘tishi bilan biz Ukraina uchun muhim yordam paketlarini tasdiqlashda davom etamiz. Siz shu kunlarda Ukrainaga Amerika yordamining barqaror oqimini ko‘rasiz”, — dedi Lloyd Ostin.