Jinoyat ishlari bo‘yicha Denov tuman sudi raisi yo‘l-transport hodisasiga uchragani, buning oqibatida u bilan bitta avtomashinada bo‘lgan advokat halok bo‘lib, o‘zi esa u turli darajada tan jarohati olgani haqida xabarlar tarqaldi. Sudyalar oliy kengashi holat yuzasidan munosabat bildirdi.
Ushbu YTH 2024-yil 9-mart kuni Surxondaryo viloyatining Denov tumanida yuz bergan. Sudyalar oliy kengashi munosabatida qayd etilishicha, xabarlarda holat yuzasidan jinoyat ishi qo‘zg‘atilib, tegishli protsessual harakatlar olib borilayotgani, shuningdek, voqelik bo‘yicha Sudyalar oliy kengashi tomonidan xizmat tekshiruvi o‘tkazilib, natijada tuman sudi raisining vakolatlari muddatidan ilgari tugatilgani aytilgan bo‘lsa-da, turli talqin va bashoratlarga berilishlar ham kuzatilmoqda.
“Xususan, holat yuzasidan tergov ishlari yakuniga yetmaganiga qaramay sud raisning vazifasidan ozod etilganini — barvaqt xulosaga kelish, yoki fojia sodir bo‘lgan paytda avtomashina boshqaruvida sudya (sud raisi) bo‘lganiga oid axborotlar ham yo‘q emas”, — deyiladi munosabatda.
Ma’lum qilinishicha, YTH bo‘yicha xizmat tekshiruvi fojiaga sabab bo‘lgan omillar va bu jarayonda sud raisining xatti-harakatlari doirasida o‘tkazilgan bo‘lib, unda Sudyalar odobi kodeksi talablari buzilgani aniqlangan. Xizmat tekshiruvi xulosasi Surxondaryo viloyati sudlari sudyalar malaka hay’atida muhokama etilib, tuman sudi raisning vakolatlarini muddatidan ilgari tugatish haqida qaror qabul qilingan.
“Mazkur qarorga nisbatan berilgan shikoyatlar esa rad etilgan. Ushbu chora intizomiy jazo xarakterida bo‘lib, tergov ishlariga daxli yo‘q”, — deyiladi Sudyalar oliy kengashi munosabatida.
Munosabat yakunida og‘ir oqibatga olib kelgan yo‘l-transport hodisasi aybdorini aniqlash tergov organi vakolatiga tegishli ekani eslatib o‘tilgan.
Izoh (0)