Жиноят ишлари бўйича Денов туман суди раиси йўл-транспорт ҳодисасига учрагани, бунинг оқибатида у билан битта автомашинада бўлган адвокат ҳалок бўлиб, ўзи эса у турли даражада тан жароҳати олгани ҳақида хабарлар тарқалди. Судьялар олий кенгаши ҳолат юзасидан муносабат билдирди.
Ушбу ЙТҲ 2024 йил 9 март куни Сурхондарё вилоятининг Денов туманида юз берган. Судьялар олий кенгаши муносабатида қайд этилишича, хабарларда ҳолат юзасидан жиноят иши қўзғатилиб, тегишли процессуал ҳаракатлар олиб борилаётгани, шунингдек, воқелик бўйича Судьялар олий кенгаши томонидан хизмат текшируви ўтказилиб, натижада туман суди раисининг ваколатлари муддатидан илгари тугатилгани айтилган бўлса-да, турли талқин ва башоратларга берилишлар ҳам кузатилмоқда.
“Хусусан, ҳолат юзасидан тергов ишлари якунига етмаганига қарамай суд раиснинг вазифасидан озод этилганини — барвақт хулосага келиш, ёки фожиа содир бўлган пайтда автомашина бошқарувида судья (суд раиси) бўлганига оид ахборотлар ҳам йўқ эмас”, — дейилади муносабатда.
Маълум қилинишича, ЙТҲ бўйича хизмат текшируви фожиага сабаб бўлган омиллар ва бу жараёнда суд раисининг хатти-ҳаракатлари доирасида ўтказилган бўлиб, унда Судьялар одоби кодекси талаблари бузилгани аниқланган. Хизмат текшируви хулосаси Сурхондарё вилояти судлари судьялар малака ҳайъатида муҳокама этилиб, туман суди раиснинг ваколатларини муддатидан илгари тугатиш ҳақида қарор қабул қилинган.
“Мазкур қарорга нисбатан берилган шикоятлар эса рад этилган. Ушбу чора интизомий жазо характерида бўлиб, тергов ишларига дахли йўқ”, — дейилади Судьялар олий кенгаши муносабатида.
Муносабат якунида оғир оқибатга олиб келган йўл-транспорт ҳодисаси айбдорини аниқлаш тергов органи ваколатига тегишли экани эслатиб ўтилган.
Изоҳ (0)