2023-yilda O‘zbekiston ichki valyuta bozorida dollarga bo‘lgan talab yuqori darajada shakllandi. Bu haqda Markaziy bank raisi muovini Behzod Hamrayev Senatdagi chiqishida maʼlum qildi.
Behzod Hamrayevning aytishicha, o‘tgan yili yuqori iqtisodiy faollik fonida chet el valyutasiga bo‘lgan talabning taklif hajmidan sezilarli darajada ortishi kuzatildi.
“O‘tgan yili ichki valyuta bozorida 2022-yildagiga nisbatan 1,2 barobar ko‘p — 33,4 milliard AQSH dollari sotildi. Valyutaga bo‘lgan talab va taklif o‘rtasidagi tafovut 2023-yilda sotib olingan 6,6 milliard AQSH dollari ekvivalentidagi monetar oltin hamda neytrallik tamoyillari doirasida o‘tgan yillarda amalga oshirilmagan intervensiyalar hisobidan qoplandi”, —dedi Markaziy bank rasmiysi.
Qo‘shimcha qilinishicha, 2023-yil yakunlari bo‘yicha mamlakatda yillik inflyatsiya 8,8 foiz darajasida shakllangan. Bu ko‘rsatkich 2022-yildagiga nisbatan 3,5 foiz past hisoblanadi. Shu bilan birga, o‘tgan yili so‘m almashuv kursining qadrsizlanishi 9,8 foizni tashkil etgan.
Izoh (0)