Joriy yilning yanvar–mart oylarida O‘zbekistonda nikohdan ajralgan oilalarning 46,2 foizi farzandsiz, 53,8 foizida bir nechtagacha farzandi bo‘lgan. Bu haqda Statistika agentligi maʼlum qildi.
Mamlakatda 2024-yil I choragida nikohdan ajralishlar soni 11500 tani tashkil etib, 2023-yilning mos davridagiga qaraganda 1500 taga kamaydi. Ajralishlarning 7100 tasi shahar joylarida (61,4 foiz), 4400 tasi qishloq joylarida (38,6 foiz) qayd etilgan.
Uch oy davomida 1 nafar farzand bilan 3402 ta (29,6 foiz), 2 va undan ortiq bola bilan 2778 ta (24,2 foiz), farzandsiz 5 301 ta (46,2 foiz) oila nikohdan ajralgan.
Toshkent shahri (1504 ta), Toshkent (1189 ta), Andijon (1178 ta) hamda Farg‘ona (1188 ta) viloyatlarida eng ko‘p, Navoiy (310 ta) va Sirdaryo (390 ta) viloyatlarida eng kam nikohdan ajralishlar bo‘lgan.
Nikohdan ajrashganlarning o‘rtacha yoshi erkaklar uchun 37,4 yoshni, ayollarda 32,5 yoshni tashkil etgan. Eng ko‘p kikohdan ajrashganlar 35 yoshgacha bo‘lgan ayollar ekani maʼlum qilingan.
Umuman olganda, 2024-yilgacha bo‘lgan uch yillik davrda nikohdan ajralishlar soni ortib bordi. Masalan, 2020-yilda 28 200 ta oila nikohdan ajrashgan bo‘lsa, 2021-yilda bu raqam 39 300 tani, 2022-yilda 48 700 tani, 2023-yilda maksimumga yetib, 49 200 tani tashkil etgan.
Izoh (0)