Yevrokomissiya 2023-yil uchun arizalarni qabul qilish bo‘yicha so‘rov natijalariga ko‘ra, Yevropa mudofaa jamg‘armasi doirasida umumiy qiymati 1,031 milliard yevro bo‘lgan 54 ta qo‘shma Yevropa mudofaa tadqiqot va ishlanma loyihalari tanlab olinganini ma’lum qildi.
“Tanlangan loyihalar kibermudofaa, quruqlik, havo va dengiz orqali harbiy harakatlar, kosmik himoya, kimyoviy, biologik, radiologik va yadroviy mudofaa kabi muhim sohalarda texnologik mukammallikni qo‘llab-quvvatlaydi”, — deyiladi Yevropa Ittifoqi bayonotida.
Qayd etilishicha, yangi ishlanmalar harbiy salohiyat sohasida Yevropa Ittifoqining ustuvor yo‘nalishlarini amalga oshirishga xizmat qiladi.
Gap, shuningdek, katta hajmli yuklarni havoda tashish, dronlar tizimlariga qarshi turish texnologiyalari, og‘ir zirhli transport vositalarining osma qismlarini takomillashtirish va boshqalar haqida bormoqda.
Tanlangan takliflarni amalga oshirishda Yevropa Ittifoqiga aʼzo 26 davlat va Norvegiyadan 581 nafar yuridik shaxs ishtirok etmoqda.
“Kelgusi yillarda ushbu qo‘shma loyihalar Yevropaning mudofaa texnologiyalari bo‘yicha kelajak qiyofasini shakllantirishga, transchegaraviy hamkorlikni rivojlantirishga va Yevropa mudofaa texnologiyalari va sanoat bazasining innovatsion salohiyatini oshirishga yordam beradi”, — deya ma’lum qildi Yevropa komissiyasi.
Izoh (0)