Eronning Mashhad shahrida 15-may kuni yuz bergan kuchli suv toshqini oqibatida kamida 7 nafar mahalliy aholi vakillari halok bo‘lgan. Bu haqda Eron mahalliy nashrlari tarqatgan maʼlumotga asoslanib, Anadolu nashri xabar berdi.
Manbada aytilishicha, hodisa oqibatida kamida 12 kishi bedarak yo‘qolgan. Ularni qidirish uchun qutqaruv guruhlari safarbar qilingan.
Toshqin kuchli yomg‘ir yog‘ishi oqibatida kelib chiqqani aytilgan. Toshqinda halok bo‘lgani aytilgan ilk qurbonlar Mashhadda yashovchi ayol va uning to‘rt nafar farzandi bo‘lgan.
Mashhad munitsipaliteti yong‘in xavfsizligi boshqarmasi boshlig‘i Hamidrizo Kafiniya qurbonlar haqida maʼlumot bergan. Ikki nafar fuqaro Mashhadning Inkilap maydonida suv ostida qolgan mashina ichida qolib halok bo‘lgan. Bir nafar ayol va uning to‘rt nafar farzandi esa toshqinda xonadonida qamalib qolib, halok bo‘lgan.
Qutqaruv brigadasi suv toshqini qurbonlariga yordam ko‘rsatishni boshlagan. Hududda qidiruv-qutqaruv ishlari davom ettirilmoqda.
Mashhad gubernatori Mohsen Daveri toshqinda jami 150 ta uy zararlanganini bildirgan. Ularda istiqomat qiluvchi 250 ga yaqin oila shaharning turli qismlari va uzoqroqdagi qishloqlarga ko‘chirilgan.
Ijtimoiy tarmoqlarda tarqalgan videolarda shaharning baʼzi qismlarida yo‘llar to‘liq yopilib qolgani, avtomobillar suvga botgani va fuqarolar ommaviy ko‘chirilayotgani ko‘ringan.
Izoh (0)