Еврокомиссия 2023 йил учун аризаларни қабул қилиш бўйича сўров натижаларига кўра, Европа мудофаа жамғармаси доирасида умумий қиймати 1,031 миллиард евро бўлган 54 та қўшма Европа мудофаа тадқиқот ва ишланма лойиҳалари танлаб олинганини маълум қилди.
“Танланган лойиҳалар кибермудофаа, қуруқлик, ҳаво ва денгиз орқали ҳарбий ҳаракатлар, космик ҳимоя, кимёвий, биологик, радиологик ва ядровий мудофаа каби муҳим соҳаларда технологик мукаммалликни қўллаб-қувватлайди”, — дейилади Европа Иттифоқи баёнотида.
Қайд этилишича, янги ишланмалар ҳарбий салоҳият соҳасида Европа Иттифоқининг устувор йўналишларини амалга оширишга хизмат қилади.
Гап, шунингдек, катта ҳажмли юкларни ҳавода ташиш, дронлар тизимларига қарши туриш технологиялари, оғир зирҳли транспорт воситаларининг осма қисмларини такомиллаштириш ва бошқалар ҳақида бормоқда.
Танланган таклифларни амалга оширишда Европа Иттифоқига аъзо 26 давлат ва Норвегиядан 581 нафар юридик шахс иштирок этмоқда.
“Келгуси йилларда ушбу қўшма лойиҳалар Европанинг мудофаа технологиялари бўйича келажак қиёфасини шакллантиришга, трансчегаравий ҳамкорликни ривожлантиришга ва Европа мудофаа технологиялари ва саноат базасининг инновацион салоҳиятини оширишга ёрдам беради”, — дея маълум қилди Европа комиссияси.
Изоҳ (0)