Braziliyada kuchli to‘fondan so‘ng suv bosgan shahardagi bino tomida qolib ketgan otni qutqarish uchun maxsus qutqaruv guruhi jalb qilindi. Bu haqda Al Jazeera nashri Lotin Amerikasi manbalariga asoslanib, xabar berdi.
Manbada aytilishicha, toshqindan so‘ng Karamelo laqabli ot bino tomida jon saqlab qolgan. Toshqinni tasvirga olayotgan kuzatuv dronlari otni payqab qolib, qutqaruv brigadalariga signal bergan.
Braziliyada ayni damda so‘nggi 80 yil ichidagi eng kuchli suv toshqinlari kuzatilayotgani maʼlum qilingan. Rasmiylar favqulodda tabiiy holat oqibatida halok bo‘lganlar soni 100 nafardan oshganini maʼlum qilishgan.
Toshqin tufayli aholisi ko‘chirib ketilgan shaharchada aniqlangan ot tasvirlari butun mamlakat aholisi orasida muhokamaga sabab bo‘lgan. Ijtimoiy tarmoqlarda bu to‘g‘risidagi xabarlar faol aylangan. Fuqarolar jonivorni qutqarishga chaqirishgan.
Rio Grande do Sul shtati janubidagi Portu-Alegre metropolitan hududi, Kanoas shahrida qiyin vaziyatga tushib qolgan Karameloni qutqarish uchun o‘t o‘chiruvchilar brigadasi zudlik bilan jalb qilingan. Qutqaruvchilar kelgunicha Karamelo bino tomidagi sirpanchiq tayanchda qiyinchilik bilan muvozanat saqlab turishiga to‘g‘ri kelgan.
Og‘irligi 349 kg bo‘lgan otni rezina qutqaruv qayig‘iga chiqarib olish qiyinchilik tug‘dirgan. Qutqaruvchilar Karameloni qayiqqa chiqarishdan oldin uni tinchlantirishga urinishgan.
Ijtimoiy tarmoqlarda otning qutqaruv jarayonini 17 million fuqaro kuzatib borgan. Jonli efir izohlari “Karamelo, Braziliya seni sevadi!” tarzidagi izohlar bilan to‘lib toshgan.
Yetti yoshda deb taxmin qilingan Karamelo hozirda veterinariya shifoxonasida davolanmoqda. Veterinariya shifokori va muassasa professori Marianjela Allgayer ijtimoiy tarmoqlarda u juda zaif holatda ekanini bildirgan.
Shtat rasmiylari maʼlum qilishicha, qutqaruvchilar toshqindan so‘ng 10 mingga yaqin hayvonlarni qutqarib qolgan. Mingga yaqin hayvon halok bo‘lgani maʼlum qilingan.
Izoh (0)