Tailand politsiyasi Aleksandr ismli britaniyalik sayyohni kafe haqida yomon izoh qoldirgani va bir yulduz qo‘ygani uchun hibsga oldi. Bu haqda Metro xabar berdi.
-Try1EaMX.jpg)
Ma’lum qilinishicha, Phuketdagi kafe egasi britaniyalikning ustidan politsiyaga ariza bilan murojaat qilgan. U sayyohga o‘z muassasasi orqali uyiga qisqa yo‘l sifatida o‘tishiga ruxsat bermaganini aytgan.
Qasos sifatida sayyoh ovqatlanish shoxobchasi haqida yomon izoh yozgan, unga bir yulduz qoldirgan va do‘stlarini ham shunday qilishga ko‘ndirgan, — deyiladi xabarda.
Natijada kafening reytingi 4,8 yulduzdan 3,1 yulduzga tushib ketgan, bu esa muassasa obro‘siga va natijada daromadga ta’sir qilgan. Aleksandrni hibsga olish uchun order 2023-yil avgustida chiqarilgan va faqat shu yilning 9-may kuni huquq-tartibot idoralari xodimlari britaniyalikning yashash joyini aniqlashga va uni hibsga olishga muvaffaq bo‘lgan.
Gumonlanuvchi qo‘shimcha tergov o‘tkazish uchun Phuketdagi Saxu politsiya bo‘limi tergovchisiga topshirilgan. Unga “zarar yetkazishga olib kelgan yolg‘on ma’lumot tarqatish...” moddasi bo‘yicha ayblov qo‘yilgan. Ushbu moddadagi jazo besh yilgacha ozodlikdan mahrum qilish va/yoki yuz ming batgacha (taxminan 34,5 million so‘m) jarimani nazarda tutadi.
So‘roq paytida sayyoh o‘z aybini tan olmagan. Bu Tailandda yomon izoh qoldirgani uchun sayyohning hibsga olinishi bilan bog‘liq birinchi holat emas. 2020-yilda amerikalik Phuketdagi Sea View kurorti haqida TripAdvisor’da salbiy izoh qoldirgach, hibsga olingandi. Keyinchalik u ommaviy kechirim so‘ragach, qo‘yib yuborilgan.
Izoh (0)