Таиландда маҳаллий кафени ёмонлаган сайёҳ ҳибсга олинди

Таиланд полицияси Александр исмли британиялик сайёҳни кафе ҳақида ёмон изоҳ қолдиргани ва бир юлдуз қўйгани учун ҳибсга олди. Бу ҳақда Меtrо хабар берди.

Маълум қилинишича, Пҳукетдаги кафе эгаси британияликнинг устидан полицияга ариза билан мурожаат қилган. У сайёҳга ўз муассасаси орқали уйига қисқа йўл сифатида ўтишига рухсат бермаганини айтган. 

Қасос сифатида сайёҳ овқатланиш шохобчаси ҳақида ёмон изоҳ ёзган, унга бир юлдуз қолдирган ва дўстларини ҳам шундай қилишга кўндирган, — дейилади хабарда.

Натижада кафенинг рейтинги 4,8 юлдуздан 3,1 юлдузга тушиб кетган, бу эса муассаса обрўсига ва натижада даромадга таъсир қилган. Александрни ҳибсга олиш учун ордер 2023 йил августида чиқарилган ва фақат шу йилнинг 9 май куни ҳуқуқ-тартибот идоралари ходимлари британияликнинг яшаш жойини аниқлашга ва уни ҳибсга олишга муваффақ бўлган.

Гумонланувчи қўшимча тергов ўтказиш учун Пҳукетдаги Саху полиция бўлими терговчисига топширилган. Унга “зарар етказишга олиб келган ёлғон маълумот тарқатиш...” моддаси бўйича айблов қўйилган. Ушбу моддадаги жазо беш йилгача озодликдан маҳрум қилиш ва/ёки юз минг батгача (тахминан 34,5 миллион сўм) жаримани назарда тутади.

Сўроқ пайтида сайёҳ ўз айбини тан олмаган. Бу Таиландда ёмон изоҳ қолдиргани учун сайёҳнинг ҳибсга олиниши билан боғлиқ биринчи ҳолат эмас. 2020 йилда америкалик Пҳукетдаги Sea View курорти ҳақида TripAdvisor’да салбий изоҳ қолдиргач, ҳибсга олинганди. Кейинчалик у оммавий кечирим сўрагач, қўйиб юборилган.