O‘zbekistonda yangi tayinlangan pensiyalar bo‘yicha maʼlumot berildi

Pensiya jamg‘armasi joriy yilning yanvar–mart oylarida yangi tayinlangan pensiyalar sonini maʼlum qildi.

Birinchi chorakda O‘zbekiston bo‘yicha 70 384 nafar fuqaroga yangi pensiyalar tayinlangan. Shundan 58 888 nafari yoshga doir pensiya, 7 532 kishi nogironlik pensiyasi ola boshlagan. Qolgan 3 964 ta oilaga esa boquvchisini yo‘qotganlik pensiyasi tayinlangan.

Eslatib o‘tamiz, 2023-yilda Pensiya jamg‘armasi tomonidan jami 292 ming nafar fuqaroga yangi pensiyalar tayinlangan. Shundan 241,2 ming kishi yoshga doir pensiya, 32,2 ming kishi nogironlik pensiyasi va 18,6 ming oila boquvchisini yo‘qotganlik pensiyasini ola boshlagan.

Hozir mamlakatda jami pensiya oluvchilar soni qariyb 4 million nafarni tashkil etadi. Ularning 3,1 million nafari pensiya to‘lovlarini naqd pulsiz shaklda oladi.

Ma’lumot uchun, 2023-yilda fuqarolarning barcha turdagi pensiyalariga 53 trillion 596 milliard so‘m to‘lab berilgan. Joriy yildagi ko‘rsatkich undan ham yuqori bo‘lishi kutilmoqda. Taqqoslash uchun, 2022-yilda to‘langan jami pensiya pullari 44,9 trillion so‘mni tashkil etgan.