Xitoyning Uxu shahrida Chery group o‘zining EXEED brendi bilan birgalikda transformatsiya jarayonlariga bag‘ishlangan xalqaro anjuman o‘tkazdi. Tadbirda dunyoning ko‘plab davlatlaridan kelgan dilerlar, investorlar va jurnalistlar ishtirok etdi, deya xabar berdi “Daryo” muxbiri.
Anjumanda Chery group raisi Yin Tongyuye nutq so‘zlab, xalqaro bozorlar ehtiyojlarini qondirishda mahsulotlarni moslashtirish va kompaniyani rivojlantirishda ko‘p brendli strategiyaning roli haqida maʼlumot berdi.
“Chery group strategiyasi markazida innovatsiyalar turadi. Bu juda muhim masaladir. Biz keyingi besh yil ichida Chery barqaror rivojlanishini taʼminlash uchun texnologik innovatsiyalarga 100 milliard yuan (13,8 milliard dollar) sarmoya kiritmoqchimiz. Shu jumladan, sakkizta global ilmiy–tadqiqot markazlari va 300 dan ortiq YaoGuang laboratoriyalari tashkil etamiz. Ushbu sarmoya kompaniyamizning butun dunyo bo‘ylab tadqiqot imkoniyatlarini kengaytiradi. Asosiy eʼtiborni elektromobil va gibrid quvvatli avtomobil texnologiyalarini rivojlantirish, sunʼiy intellektni integratsiyalash va atrof-muhitga zararli taʼsirni kamaytirish uchun ishlab chiqarish jarayonlarini takomillashtirishga imkon beradi”, — dedi Yin.
Xalqaro tadbirda Chery International kompaniyasi tomonidan ishlab chiqilgan shaxsiy foydalanish va biznes uchun texnologiyalar namoyish qilindi.
Xususan, ilg‘or dizayn va imkoniyatlarga ega birinchi “uchar likopchali” dron hamda robot it texnologiyasi taqdim etildi.
Chery International bosh menejeri Chjan Guibing robot it bilan muloqotda bo‘lib, uning jonli shovqinlarni taqlid qilish uchun mo‘ljallangan interaktiv imkoniyatlarini namoyish etdi.
“Mazkur sunʼiy intellekt texnologiyasi kelajakda insonlar hayotida ajralmas shaxsiy yordamchi bo‘lishi mumkin. Bu innovatsiyalar tez orada butun dunyo bo‘ylab odamlarga ko‘plab yumushlarda qulaylik yaratadi”, —dedi bosh menejer.
Anjumanda Chery International ijrochi vitse-prezidenti Charli Chjan Chery group va uning premium brendi EXEED Tabiatni muhofaza qilish xalqaro ittifoqi bilan hamkorlik dasturini amalga oshirayotganini aytdi.
“O‘tgan yillar davomida Chery ekologik dasturlarni amalga oshirishda Tabiatni muhofaza qilish xalqaro ittifoqi bilan yaqindan hamkorlik qilib kelmoqda. Biz biologik xilma-xillikni saqlash va yashash joylarini muhofaza qilish kabi yaxshi loyihalarni amalga oshirmoqdamiz”,—dedi u.
Taqdimotda Chery Xitoy bo‘yicha avtomobil eksportida yetakchi o‘rinda ekani aytildi. Umuman olganda, anjumanda taqdim etilgan yangiliklar, turli qiziqarli chiqishlar ishtirokchilarda yaxshi taassurot qoldirdi.
Izoh (0)