Ukraina Rossiya bilan qurolli mojaroga barham berish bo‘yicha muzokaralarni boshlash uchun yetarli darajada kuchli holatda emas, dedi AQSH Davlat kotibining siyosiy masalalar bo‘yicha sobiq o‘rinbosari Viktoriya Nuland.
Politico nashriga bergan intervyusida AQSHning Ukraina va Rossiyaga nisbatan tashqi siyosatini uzoq vaqtdan beri kuzatib kelayotgan amerikalik sobiq mulozim Kiyevni 2022-yilda Moskva bilan tinchlik muzokaralariga undamaslik xato bo‘lganmidi, degan savolga javob berdi.
Ular o‘sha paytda yetarlicha kuchli pozitsiyada emas edi. Hozir ham ularning pozitsiyasi unchalik kuchli emas, — deb javob berdi Nuland.
Diplomatning qo‘shimcha qilishicha, 2022-yilda ham, hozir ham erishilishi mumkin bo‘lgan yagona kelishuv Rossiyaning hududiy masala bo‘yicha har qanday yon berishdan bosh tortishiga asoslangan bo‘ladi.
Bunday kelishuv barqaror bo‘lmas edi, — dedi Nuland.
Kiyev Qrimni kuch bilan egallab olishi mumkinmi, degan savolga Nuland “Ukrainaning hududiy ambitsiyalari uning xalqiga bog‘liq bo‘ladi”, deb javob berdi. Shu bilan birga, AQSH rasmiylari avvalroq Ukrainaning yarimoroldagi nazoratni kuch bilan qaytarish imkoniyatini ochiq tan olgan edi.
Izoh (0)