Xitoy poytaxtida xalqaro avtomobillar ko‘rgazmasi o‘tkazilmoqda. Bu haqda ayni paytda Pekin shahrida bo‘lib turgan “Daryo” muxbiri xabar berdi.
Ko‘rgazmada 500 ga yaqin mahalliy hamda xorijiy avtomobil va butlovchi qismlar ishlab chiqaruvchi kompaniyalar, dilerlar, OAV vakillari va avtoishqibozlar ishtirok etmoqda.
Pavilyonlardan birida EXEED kompaniyasi ham yangi avtomobillarini namoyish qilyapti.
Kompaniya bosh direktori Chao Qin dilerlar va jurnalistlar bilan uchrashuvda avtomobil ishlab chiqarishning yangi bosqichi qanday bo‘lishi to‘g‘risida gapirdi.
EXEED 2021-yilda TX avtomobil modeli bilan xorij bozorlariga chiqishni boshlagan. O‘tgan davrda biz anʼanaviy marketing strategiyasidan yuqori darajadagi brending tizimiga o‘tdik. Biz mijozlarimizga yuqori sifatli, eksklyuziv avtomobillar ishlab chiqarishda davom etamiz. Kompaniya o‘z strategiyasini ikki yo‘nalishda belgilab oldi. Birinchisi — ichki yonuv dvigatelli (ICE) va gibrid (PHEV) modellar, ikkinchisi — elektromobillar ishlab chiqarishdir. Kelgusida bir necha yangi modellarni ishlab chiqarishni rejalashtirganmiz. Xususan, mijozlarimizga RX–PHEV, EXLANTIX ES va E08 MPV kabi yuqori texnologiyali avtomobillarni taqdim etamiz, — dedi kompaniya rahbari.
Chao Qin nomlarini sanab o‘tgan yangi modellar xalqaro ko‘rgazma pavilyonidan joy olgan.
Maʼlum qilinishicha, kelasi haftada Vuhu shahrida RX-PHEV modelining taqdimoti bo‘lib o‘tadi. Tadbirda yangi avtomobilning barcha imkoniyatlari to‘g‘risida axborot beriladi.
Maʼlumot uchun, Pekin xalqaro avtomobillar ko‘rgazmasi 1990-yildan beri o‘tkazib kelinadi. Bu yilgi ko‘rgazmalar maydoni qariyb 220 ming kvadrat metrni tashkil etdi. Pavilyonlarga dunyoning eng kuchli brendlaridan tortib yangi kompaniyalargacha o‘z avtomobillarini joylashtirgan. Joriy ko‘rgazmada 117 ta yangi modeldagi avtomobillar, 41 ta konseptual avtomashinalar namoyish qilinmoqda. Ko‘rgazma 4-maygacha davom etadi.
Izoh (0)