“Келгуси беш йилда технологик инновацияларга 100 млрд юань сармоя киритамиз” — Chery group раиси Инь Тоньяо

Хитойнинг Уху шаҳрида Chery group ўзининг EXEED бренди билан биргаликда трансформация жараёнларига бағишланган халқаро анжуман ўтказди. Тадбирда дунёнинг кўплаб давлатларидан келган дилерлар, инвесторлар ва журналистлар иштирок этди, дея хабар берди “Дарё” мухбири.

Анжуманда Chery group раиси Инь Тоньяо нутқ сўзлаб, халқаро бозорлар эҳтиёжларини қондиришда маҳсулотларни мослаштириш ва компанияни ривожлантиришда кўп брендли стратегиянинг роли ҳақида маълумот берди.

“Chery group стратегияси марказида инновациялар туради. Бу жуда муҳим масаладир. Биз кейинги беш йил ичида Chery барқарор ривожланишини таъминлаш учун технологик инновацияларга 100 миллиард юань (13,8 миллиард доллар) сармоя киритмоқчимиз. Шу жумладан, саккизта глобал илмий–тадқиқот марказлари ва 300 дан ортиқ YaoGuang лабораториялари ташкил этамиз. Ушбу сармоя компаниямизнинг бутун дунё бўйлаб тадқиқот имкониятларини кенгайтиради. Асосий эътиборни электромобиль ва гибрид қувватли автомобиль технологияларини ривожлантириш, сунъий интеллектни интеграциялаш ва атроф-муҳитга зарарли таъсирни камайтириш учун ишлаб чиқариш жараёнларини такомиллаштиришга имкон беради”, — деди Инь Тоньяо.

Халқаро тадбирда Chery International компанияси томонидан ишлаб чиқилган шахсий фойдаланиш ва бизнес учун технологиялар намойиш қилинди.

Хусусан, илғор дизайн ва имкониятларга эга биринчи “учар ликопчали” дрон ҳамда робот ит технологияси тақдим этилди.

Chery International бош менежери Чжан Гуибинг робот ит билан мулоқотда бўлиб, унинг жонли шовқинларни тақлид қилиш учун мўлжалланган интерактив имкониятларини намойиш этди.

“Мазкур сунъий интеллект технологияси келажакда инсонлар ҳаётида ажралмас шахсий ёрдамчи бўлиши мумкин. Бу инновациялар тез орада бутун дунё бўйлаб одамларга кўплаб юмушларда қулайлик яратади”, —деди бош менежер.

Анжуманда Chery International ижрочи вице-президенти Чарли Чжан Chery group ва унинг премиум бренди EXEED Табиатни муҳофаза қилиш халқаро иттифоқи билан ҳамкорлик дастурини амалга ошираётганини айтди.

“Ўтган йиллар давомида Chery экологик дастурларни амалга оширишда Табиатни муҳофаза қилиш халқаро иттифоқи билан яқиндан ҳамкорлик қилиб келмоқда. Биз биологик хилма-хилликни сақлаш ва яшаш жойларини муҳофаза қилиш каби яхши лойиҳаларни амалга оширмоқдамиз”,—деди у.

Тақдимотда Chery Хитой бўйича автомобиль экспортида етакчи ўринда экани айтилди. Умуман олганда, анжуманда тақдим этилган янгиликлар, турли қизиқарли чиқишлар иштирокчиларда яхши таассурот қолдирди.