Kadastr agentligi Toshkent shahar boshqarmasi boshlig‘i Bekzod Toshxo‘jayev o‘zboshimchalik bilan qurilgan uy va imoratlar ayovsiz buzilishidan ogohlantirdi.
Bugungi kunda ko‘plab fuqarolar Qonunchilik palatasi tomonidan ko‘rib chiqilib, Senatga yuborilgan “Noqonuniy o‘zlashtirib olingan hamda mazkur yerlarga o‘zboshimchalik bilan qurib olingan obyektlarga nisbatan mulk huquqini e’tirof etish” to‘g‘risidagi qonunni kutmoqda.
Bekzod Toshxo‘jayevning bildirishicha, hujjati yo‘q uylarga kadastr hujjatlarini qilib berish boshlanishi haqidagi xabarlar tarqalganidan keyin ayrim shaxslar tezkorlik bilan imorat qurib olib, “bu uyni 5-10 yil oldin qurganman, deb iddao qilsam, hujjatlashtirib olaman” deb o‘ylashi natijasida hududlarda yerlarni o‘zboshimchalik bilan egallab, qurilish qilayotganlar ham uchramoqda.
Ammo “Qonun chiqsa, uyimga hujjat qilib olaman” deb, noqonuniy qurilish boshlab yuborganlar xato o‘ylashadi. Sababi Kadastr agentligi tomonidan yerlarning holatini o‘rganish bo‘yicha kosmik syomkalar, xaritalar bor. Ular yordamida 5-10 yil, hatto 20 yil ortga qaytarib tekshirishimiz mumkin. Bu jarayonda insonlar faqat o‘zlariga moddiy zarar ko‘rishlari bilan bir qatorda, jinoiy javobgar bo‘lishlari mumkin, — deydi Kadastr agentligi Toshkent shahar boshqarmasi boshlig‘i.
Yerlarni o‘zboshimchalik bilan egallab olganlik, u yerga noqonuniy qurilmani amalga oshirganlik uchun qonunchilikda ma’muriy javobgarlikdan jinoiy javobgarlikkacha choralar belgilangan.
“Shuning uchun bunday toifadagi insonlar hozirgi kunda o‘zboshimchalik bilan imorat qurayotgan bo‘lsa, o‘z-o‘zidan to‘xtatishlarini va yerni asl holatiga qaytarishlarini so‘raymiz”, — deydi Bekzod Toshxo‘jayev.
Uning ma’lum qilishicha, qabul qilinishi kutilayotgan qonunda hozirgi davrda egallab olib, qurilish qilayotgan binolarga huquqni e’tirof etish nazarda tutilmagan. Aksincha hozirda yerlarni o‘zboshimchalik bilan egallab, noqonuniy qurilish qilayotganlar qonunbuzurlik turiga ko‘ra ma’muriy yoki jinoiy javobgarlikka tortiladi.
Ayni paytda agentlikning Toshkent shahar boshqarmasi va uning hududiy bo‘limlarida “Dolzarb 40 kunlik” doirasida yer nazorati ishlarini faollashtirish, o‘zboshimchalik bilan egallab olingan yerlarni aniqlash va qonun buzilishi holatlariga nisbatan keskin choralarni ko‘rish uchun doimiy ishchi guruhlari tuzilib, o‘z ish faoliyatini boshladi.
Mazkur jarayonda yer nazoratchi inspektorlar tomonidan aniqlangan holatlar joyiga chiqqan holda maxsus planshetlar yordamida “E-yer nazorat” axborot tizimiga kiritiladi va onlayn nazorat qilinadi. Jinoyat alomatlari bor holatlar, ya’ni sug‘oriladigan yerlarni o‘zboshimchalik bilan egallash va unda noqonuniy qurilish qilish holatlari prokuratura organlariga yuborilmoqda.
Izoh (0)