Amerikalik taniqli bokschi Bahodir Jalolov haqida fikr bildirdi

Superog‘ir vazn toifasida amerikalik professional bokschi Jared Anderson Bahodir Jalolov haqida gapirdi.

Anderson talkSPORT nashri muxbiri bilan suhbatda og‘ir vazn toifasining bo‘lajak yetakchilari haqida so‘z yuritdi.

“Buni aytish qiyin, chunki bu vaznda bitta o‘tkazib yuborilgan zarba tufayli kimdir faoliyatini tugatishi mumkin. Ha, juda qiyin. Ammo divizionimizda bir necha mahoratli bokschilar bor. Muxlislarga Jastis Huni yoqadi. 

Menimcha, u juda tajribali bokschi. Ko‘ramiz, u nimaga erisha olar ekan. Bahodir Jalolov ham yaxshi. Menimcha, uni “sindirish” oson ish emas. Ammo ishonchim komil-ki, agar siz uning oldingi qo‘lini aylanib o‘tsangiz, juda sodda jang qilishini ko‘rasiz”, — dedi Anderson.

Ma’lumot uchun, 24 yoshli Jared Anderson professional ringda 17 ta jang o‘tkazib, barchasida g‘alaba qozongan. Janglarining 15 tasida raqiblarini nokautga uchratgan. 

WBC aprel oyi uchun yangilagan reytingda Bahodir Jalolov o‘z vazn toifasida 12-o‘rinni egallab turibdi. U professional ringda 14 bora jang qilgan va janglarning barchasida muddatidan oldin raqiblari ustidan g‘alaba qozongan.