Xitoy Fanlar akademiyasi rekord darajadagi batafsil geologik xaritalardan iborat Oy atlasini tuzdi. 100 dan ortiq tadqiqotchilar uni o‘n yil davomida to‘ldirdi. Bu haqda Space.com xabar berdi.
Xaritalar misli ko‘rilmagan 1:2 500 000 masshtabda yaratilgan bo‘lib, ular 12 341 ta krater, 81 ta havza, 17 ta cho‘kindi va tog‘ jinslarning joylashuvini, xususiyatlarini, shuningdek, Oy yuzasi haqidagi boshqa asosiy geologik ma’lumotlarni o‘z ichiga oladi. Kraterlarning yosh guruhlari turli ranglarda ifodalangan, binafsha rang eng qadimgilarini ko‘rsatadi.
“Oyning geologik atlasi tabiiy yo‘ldosh evolyutsiyasini o‘rganish, bo‘lajak tadqiqot stansiyasi uchun joy tanlash va Oy resurslaridan foydalanish uchun katta ahamiyatga ega. Shuningdek, u bizga Yerni va quyosh tizimidagi boshqa sayyoralarni, jumladan, Marsni ham yaxshiroq tushunish imkonini beradi”, — deydi Xitoy Fanlar akademiyasi akademigi va mashhur Oy tadqiqotchisi Ouyang Sziyuan.
Xitoylik olimlar va kartograflar 2012-yilda atlas yaratishni boshlagan. Mutaxassislar tabiiy yo‘ldosh yuzasining xususiyatlari haqida Oy zondlaridan ma’lumot olgan. Atlas uchun ma’lumotlar Change’ning bir qator muvaffaqiyatli missiyalari paytida qabul qilingan.
Izoh (0)