Xalqaro sud Nikaraguaning Germaniyaga qarshi “Genotsidning oldini olish to‘g‘risidagi konvensiya”ni buzganlikda ayblagan da’vosini rad etdi. Bu haqda Reuters xabar berdi.
Gaaga sudi Germaniya Isroilga yordam berishni, jumladan, qurol eksportini to‘xtatishga majbur emas, deya qaror chiqardi. Shu bilan birga, sud Germaniyaning sud jarayonini tugatish haqidagi iltimosini rad etgan.
Nikaraguaning Germaniyaga qarshi da’vosi
8—9-aprel kunlari Xalqaro sudda ko‘rib chiqilgan Nikaraguaning Germaniyaga qarshi da’vo arizasida Germaniya Isroilga harbiy yordam ko‘rsatish orqali “Falastin xalqiga qarshi sodir etilgan va sodir etilayotgan genotsidning oldini olish majburiyatini bajarmagani” va shu tariqa, “konvensiyani buzgan holda genotsid sodir etilishiga hissa qo‘shgani” ta’kidlangan.
Da’vo arizasida suddan Germaniyaning Isroilga harbiy yordamini to‘xtatib qo‘yish uchun “vaqtinchalik choralar” ko‘rish so‘ralgan. Germaniya Nikaraguaning ayblovlarini qat’iyan rad etgan. Germaniya Tashqi ishlar vazirligining xalqaro huquq bo‘yicha komissari Tanya fon Uslar-Glyayxenning ta’kidlashicha, bunday ayblovlar “hech qanday qonuniy yoki daliliy asosga ega emas”.
U Berlin xalqaro konvensiya va normalarni buzmaganini bildirdi va Isroilning o‘zini himoya qilish huquqiga egaligi, Isroil xavfsizligi Germaniya uchun ustuvor vazifa hisoblanishini aytdi. Ayni vaqtda Berlin G‘azo sektoridagi tinch aholi huquqlari va himoyasini ta’minlash choralarini ko‘rmoqda.
Izoh (0)