Pandemiya davrida Yevropa Ittifoqi davlatlari tomonidan sotib olingan va soliq to‘lovchilarga 4 milliard yevroga tushgan kamida 215 million doza COVID-19 vaksinalari tashlab yuborildi. Bunday xulosa Politico nashrining hisob-kitoblaridan kelib chiqadi.
Politico hisobi Yevropaning 19 davlati maʼlumotlariga asoslanadi – ulardan 15 tasi nashrga to‘g‘ridan to‘g‘ri raqamlarni taqdim etgan, yana to‘rttasida tashlab yuborilgan vaksinalar hajmi haqida mahalliy OAV xabar bergan. Eng eski ma’lumotlar 2022-yil dekabrga oid, eng yangisi — 2023-yil dekabrga.
Koronavirus pandemiyasi boshlanib, vaksinalar tasdiqlanganidan beri Yevropa Ittifoqi davlatlari birgalikda 1,5 milliard doza (Yevropadagi har bir odam uchun uch dozadan ko‘proq) preparat olgan.
O‘rtacha, odam boshiga eng ko‘p vaksina dozasi Estoniyada utilizatsiya qilingan. Tashlab yuborilgan vaksinalar soni bo‘yicha esa Germaniya yetakchi bo‘ldi (83 million doza).
Nashr qayd etishicha, bir qator mamlakatlar, jumladan, Fransiya, Polsha, Latviya, Chexiya, Vengriya va Gretsiya hukumatlari vaksinalarni utilizatsiya qilish hajmini oshkor qilishdan bosh tortgan.
Bundan tashqari, Germaniya ma’lumotlarni 2023-yil iyun oyida taqdim etgan — o‘sha paytda uning zaxirasida yana 120 million doza bor edi, ammo o‘shandan beri ishlab chiqaruvchilar koronavirusning so‘nggi variantlariga moslashtirilgan vaksinalarning yangi versiyalarini taqdim etdi, bu esa avvalgi vaksinalar eskirgani va tashlab yuborilgani ehtimolini oshiradi.
Shunday qilib, tashlab yuborilgan vaksinalarning haqiqiy soni ancha yuqori, deb yozadi Politico.
Nashr OAVda e’lon qilingan narxlarga asoslanib, tashlab yuborilgan 215 million vaksinaning qiymatini 4 milliard yevrodan oshiq deb baholadi.
Izoh (0)