Британ-швед фармацевтика компанияси AstraZeneca илк бор коронавирусга қарши вакцинаси ўлимга олиб келадиган ножўя таъсирга эгалиги, яъни тромб ҳосил қилишини тан олди. Бу ҳақда The Telegraph хабар берди.
Оксфорд университети билан ҳамкорликда ишлаб чиқилган вакцина беморларга жиддий зарар етказгани ёки ўлимга олиб келгани сабабли компанияга қарши жамоавий даъво қўзғатилган. Жабрланганлар ва марҳумларнинг яқинлари AstraZeneca компаниясидан 100 миллион фунт стерлинггача (124 миллион 733 минг доллар) товон пули талаб қилмоқда.
Жабрланганлардан бири Жейми Скотт бўлиб, у 2021 йилнинг апрель ойида вакцинани олганидан сўнг тромб ҳосил бўлиб, миясига қон қуйилган. Бу эса органнинг тузатиб бўлмайдиган шикастланишига олиб келган.
“Вакцина жуда кам ҳолларда тромбоцитопения синдроми (ТТС) билан тромга олиб келиши мумкин. Бунинг сабаблари номаълум”, — дея The Telegraph компаниянинг Скотт адвокатлари билан ёзишмаларидан парча келтирган. Бундай касаллик тахминан 20 фоиз ҳолларда ўлимга олиб келади.
AstraZeneca вакцинаси билан эмланганларда тромб ҳосил бўлгани ҳақида хабарлар 2021 йилда бошланган, аммо Европа регулятори бунга далил топмаган. Судда компания вакцина тромбни келтириб чиқариши, аммо камдан-кам ҳолларда эканини тан олди.
Ўз навбатида, Франкфуртдаги Гёте университети профессори Ролф Маршалек AstraZeneca вакцинасидан кейин тромб пайдо бўлишини аденовирус векторлари билан боғлиқлиги эҳтимолини айтди. Вакцина аденовирусдан COVID’нинг бошоқ оқсилини инсон танасига етказиш учун фойдаланади. Бошоқ оқсили соғлом ҳужайранинг ситозол суюқлигига (коронавирус одатда оқсилларни ишлаб чиқарадиган жой) эмас, балки ядрога йўналтирилади. Шундан сўнг бошоқ оқсилининг қисмлари парчаланади ва ҳужайра мембранасига боғлана олмайдиган, иммунизацияга олиб келадиган мутацияларни ҳосил қилади. Натижада мутант версиялар тахминан 100 000 кишидан бирида тромбни келтириб чиқаради.
Financial Times нашри Маршалекнинг қарашларини илмий ҳамжамият томонидан муҳокама қилинаётган кўплаб версиялардан бири деб атади.
Изоҳ (0)